مېیانوو هەواڵی بە پاو هەواڵێوە تۆرەو مافەکا مرۆڤو کوردەسانی وەریشە مورادیە، دماو ئانەی جە ٨و تشرینو دووەم و ئێساڵینە جەلایەنو لقو ١٥ دادگاو شۆڕشو ئیسلامیی تارانیوە بە تۆمەتەو "یاخیبییەی جە دژو دەسەڵاتی" سزاو جەقەنارەدایش پەی بڕیێبێوە، بە ئەمرەو ناوەندە ئەمنییەکا و وەرپەرسا زینانو ئێڤینی جە مافو دەسیاوای بە خزمەتگوزاری پزیشکی و تەندروسی بێبەشە کریێنە.

ئا زینانییە سیاسیۍ کە مانگەی ویەردێنە پەی ماوەو ٢٠ ڕوا مانیش جەواردەی گێرتەبێ، تووشو گرفتو گەڎۍ و کۆئەندامو هەرسی بیێنە و هەرچڼە قەراربێ سەرو مەسرەفو وێش رەوانەو ناوەندێ پزیشکی بکریۆنە جە بەرو زینانینە، بەڵام وەرپەرسا زینانی ئەرەیاونانشا، بەمەڵامەتو ئانەی سزاو جەقەنارەدایش پەی بەرەشییەن ڕا نمەڎا جە زینانەنە بلۆ جبەرۆ.

بێجگە چانەیە وەریشە مورادیە تووشو ئێشۍ قورسو جومگەی و مازی ئێشەی بیێنە و دماو ئانەی خولێوە چارەسەری فیزیۆتراپی (چارەسەری سروشتیش) هۆرگێرتەبۍ، بەمەڵامەتو مانگێرتەکەیشۆ ئا چارەسەریەیچشە مردان.

وەریشە مورادیە ئەندامەو گلێرکەو ژەنا ئازادی وەرکەوتو کوردەسانی (کەژار) دماو ئانەی جە ١و ئابو ٢٠٢٣ جە نزیکو سنەینە باڵبەسە کریا و دماو دووێ حەفتا فاڕیاوە پەی ژمارە ٢٠٩و زینانو ئێڤینی و بەمەبەسو هۆرگێرتەی دڎان نیای پۆرەی زۆرە ملێ وزیا چێرو ئەشکەنجەی قورسیۆ، ماوەو ٥ مانگا چا بەشەنە مەنۆ و دماتەر فاڕیاوە پەی بەشو ژەنا زینانەکەی.

مورادیە جە ١٠و تشرینو یوەمیۆ پەی ماوەو ٢٠ ڕوا جە دژو سەپنای و جابەجێکەردەی سزاو جەقەنارەدای سەرو زینانیارە جە زینانەکا ئێرانینە مانیش جەواردەی گێرتە بۍ.