جەژنەو نەورۆزی کە جە ٨٩ مېیانانە جە کوردەسان و تورکیانە پیرۆزە مکریۆ، بە جۆش و خرۆشۆ بەردەواما. پېسە گرڎ ساڵۍ جە ٢١و ئادارینە جە ئامەد بە بەشداری سەڎان هەزارکەسا مەراسیمی گۊرە ئەنجام مڎریۆ. بە بانگەوازو 'ئاشتی و گلېرگەو دیموکراتیک'ی ڕابەر ئاپۆی نەورۆز پیرۆز مکریۆ.

نەورۆزو ٢١و ئاداری بە هوتافەو 'ڕابەرایەتی ئازاد، گلېرگەی دیموکراتیک' جە پارکو نەورۆزی جە ناوچەو ڕەزانی ئامەدینە پیرۆز مکریۆ.

سەرۆکۊو کۆمیتەو ئاماڎەکاری نەورۆزی و هامسەرۆکو شارو ئامەدو دەم پارتی گوڵشەن ئۆزەرە سەرو ئاماڎەکارییەکا نەورۆزی پەی ئاژانسوو هەواڵوو فوراتی (ANF) قسێش کەردۍ و واتش: "بە بانگەوازو ٢٧و شوباتو ئېژا ئۆجالانی ئاماڎەکارییەکۍ نەورۆزی دەسشا پنەکەرڎ. پەیامەکە ڕەنگش بە ٨و ئاداری دا. ٨و ئاداری بە بەشداریێوە بە هێزو ژەناوە پیرۆز کریا. بە هیواو ئانەی نەورۆزو ئېساڵی بۆ بە نەورۆزو ئاشتی و ئازادی گەلەکەیما جە مېڎانەکانە بیمۍ. پېسە ئېژا ئۆجالان واتش ئێساڵ مەبۆ بە ساڵەو ئازادی'. پی هوتافێوە چەمەڕاو گرڎ کەسێنمۍ کە بەشداری جە مەراسیمەکا نەورۆزینە بکەرا."

'ئینایمۍ پڕۆسێوەنە و ئینایمۍ حەسرەتو ئاشتینە'

گوڵشەنە ئاماژەش پانەیچ دا پەی ئەرەیاۋنای داواو ئاشتی و ئازادی جە مېڎانوو نەورۆزینە بیمۍ و واتش: "ئینایمۍ سەردەمێنە گرڎ ڕوۍ ژەنی و زاوڵۍ گەشمەرڎۍ مکریا. ئەر گلېرگێوە دیموکراتیک وەش بکریۆ، دەرفەت وەش بۆ کە جەهانێوە ئەرەمەرزیۆ ژەنی، زاوڵۍ گەشمەرڎۍ نەکریا. ئینە یۆن جە هیوا و ئامانجەکاما."

'نەورۆز مزانی ئاشتی و ئازادییا'

گوڵشەن ئۆزەرە ئاماژەش پانەی دا کە نەورۆز پەی کوردا بە ماناو سەرجەنۆ ژیۋایۆ مۍ و واتش: "نەورۆز مڎرامانو ئەرەپڕاین، ئەوەکۊشاین جە دژو زوحاکەکا. ژیۋایۆ سروشتیا. نەورۆز مزانی ئاشتی و ئازادییا."