کوردستانەنە جەنگ و شارەکانە بەردەواما. فاشیزموو ئاکەپە-مەهەپەی گرد ڕوێ چندین جارێ کەش و دەگایەکاو کوردستانی بۆردومانێ مکەرۆ. چی بۆردومانانە بۆمبی تاکتیکی و ئەتۆمی بەکارمارۆ. هجوومەکاو فاشیستی قڕکەری پێسەو ئانەیە سەرنیشتوو کوردستانینە مکریانە، سەروو سەرنیشت و وەرنیشتوو کوردستانیچوە مکریانێ. جە ئەنجاموو ئا هجوومانە و گرد ڕوێ وەڵاتپارێزناو کوردی مکوشیانە و زەرەرێوی فرە وەروو سروشتوو کوردستانی مگنۆنە. وەراوەروو هجوومەکاو فاشیزموو ئاکەپە-مەهەپەینە کەش و شارەکانە کۆشیای مکریۆ. شارەکانە جەنگاوەراو یەپەسەی و هەبەدەهەی تەرسیشا وستێنە دڵوو دەزگا فاشیستییەکا و هامکارەکاشاوە. کەشیچۆ گەریلاکاو هەپەگەی و یەژا ستاری جە چل ساڵەو جەنگوو ئازادیینە کە ١٥و ئابوو ١٩٨٤یوە دەسش پەنە کەردەن، گورزی قورسشا وەنەو سیستمی فاشیستی قڕکەری وستەن. فاشیستی ئاکەپە-مەهەپەی بەرەو وڕای مبەرانێ. پێسە ئاشکران ئارۆ جەنگ سەروو هەرێمەکاو پارێزنای مێدیایوە زیاتەر بییەن.  گرد ڕوێ زاپ، ئاڤاشین، خواکورک و مەتینانە جەنگ بەردەواما. جگە ئانەیە سوپاو تورکی داگیرکەری فاشیستی گرد جۆرە چەکێوی قەدەغەکریا و بەکارمارۆ و هەرێمەکان بۆردومانێ مکەرۆ، وەراوەرنە گەریلاکاو ئازادیی کوردستانی دژوو ئی هجووما  کۆشیای بێهامتا مکەرانە و بە چالاکییەکاشا گورزی کوشندە وەنەو سوپاو تورکی فاشیستی و قڕکەری مشانانێ. هجوومەکاو داگیرکارییەکاو فاشیستی ئاکەپە-مەهەپەی جە ١٦و نیسانیوە بەتایبەت هجوومەکێشا سەروو هەرێموو مەتینایوە زیاتەرێ بیێنێ. گرد ڕوێ هجوومێ داگیرکاری فاشیستی مکریانە. گەریلاکاو ئازادییچ ش بە کەردەی چالاکی دژوو ئەم هجووما مدرانێوە. بە پاو ئامارەکاو هەپەگەی،٨٢ چالاکییانە هەرێمەکانە ٤٨ داگیرکەرێ سزێ دریێنێ. ئەڵبەتە ڕێژەو ئا داگیرکەرا کە سزا دریێنێ و ئا زەرەرا وەروو ئامرازە سەروازییەکاو داگیرکەرا کەوتێنێ فرە زیاتەرێنێ.  بە پاو زانیارییە ئەرەیاونیاییەکاو هەپەگەی، دماچالاکی گەریلای چا هەرێمانە وەڵێ یەرێ ڕوانە کەشوو ئۆرتێی هەرێموو مەتیناینە کریان. گەریلاکاو ئازادیی کوردستانی دژوو سوپای داگیرکەرێ، کە بە یارمەتیی پەدەکەی کەشوو ئۆرتێنە بنێشا وستێنە یەرێ قۆڵێوە چالاکی هەماهەنگییشا کەردەن، هەرپاسە واوەی چاپەمەنییەکاوە وەڵا کریانوە هەرێمەکاو ئاڤاشینی و جۆلەمێرگینە چالاکییەکاو گەریلای بەردەوامێنێ و ئەنجاموو ئا چالاکییانە گورزی کوشندە وەروو هێزەکاو ئاکەپەی و مەهەپەی کەوتەن.

جگە چا جەنگەیە کە ڕاو تونیلەکاوە  مکریۆنە وەڵێکەوتەێوی گەورە گورزەکاو گەریلاینە دژی درۆنی جەنگیی سوپاو تورکی هەن. فەرماندەو ناوەندوو هەپەگەی نەورۆزنە بە ئەرەیاوناێوی واتش، کە هێزەکاو گەریلای ماوەو ١٣ مانگی ئاخرینە ١٥ فڕۆکێ جەنگیێشا وستێنێرە واری. ئینە وەختێوەنە، کە ٢٧و ئایارینە قەندیلنە و ٦و حوزەیرانیچەنە هەرێموو ئاسۆسینە دووێ فڕۆکێ جەنگیێ تەرێ گەریلای وستێرە واری. هەرپاسە ١٢و حوزەیرانیچنە فڕۆکێو جەنگکەری فاشیستوو تورکی نزیکوو سلێمانیینە وزیارە واری.  گەر سەرکەوتەی دەسەڵاتداریی ئەردۆغانی وەرەچەم بگێرمێ، کە وابەستەش مکەرۆ بە هجووموو فرۆکەی جەنگییوە و بە سەرکەوتەی نیشانەش مدۆنە، ئانە بە پاو ئەنجامەکا ڕاوەبەریی ئەردۆغانی بە شێوێوی فرە ئاشکرا شپرزە بییەن و تێکشییەن. هەرپاسە دەسەڵاتداریی ئەردۆغانی پێسەو بارزگانیکەردەی ئی فڕۆکە جەنگییا مورەشۆوە بە وەڵاتای تەری. گەر جە حەقیقەتوو ماڕای ئی فڕۆکانە وردێ بیمێوە ئیتر ئا بەرە بازرگانیێ پەی ڕاوەبەریی ئەردۆغانی وزیێنێرە. ئینەیچە بە ماناو وڕای دەسەڵاتداریی فاشیستیی ئاکەپە-مەهەپەی مێ جە ڕووەو فرەبییەی قەیرانە ئابووری و سیاسییەکاوە. بە شێوێوی ئاشکرا دیارا جەنگوو داگیرکاریی فاشیستی کوردستانەنە دماییش بە ئابووری و سیاسەتوو تورکیای ئاردەن. شکستوو هێزە فاشیست و کۆکوشەکا و گورزە قورسەکاو گەریلاکاو ئازادیی کوردستانی جە سوپاو تورکی، قەیرانی ئابووری و سیاسیی تورکیایش قووڵتەر کەردەنۆ. دیارتەرین ئەنجامووو ئینەیچە  ورچنیەیەکاو ٣١و ئادارینە موینیۆ.

سەرەڕاو  ئانەیە ئۆپەراسیۆنە سەرکەوتە شۆڕشگێڵنەکاو گەریلاکا زمسانوو ٢٠٢٣ و ٢٠٢٤  زاپنە، پەی گەلوو کوردی و هێزە دیموکراتیکەکا بییەن بە هومێد  و هێز، هەمان وەختەنە، هێزەکاو گەریلای بە ئۆپەراسیونەکاشا، گورزی وێرانکەرشا وەنەو ئاکەپە- مەهەپەی دان و دەسەڵاتداراو فاشیستاشا شڵەژنێنێ. ئەنجامەنە فاشیزموو ئاکەپەی و مەهەپەی ورچنیەیەکاو ٣١و ئادارینە دۆڕیێنێ و ئاکەپە جە پارتوو ئەوەڵیوە پەی پارتوو دووەمی وەستەنرە و شەرعیەتی سیاسیی وێش جەدەس دا. گەلوو کوردی ڕاش بە فاشیزمی نەدا و دماییش بە ڕژێموو قەیومەکا ئارد کوردستانەنە .

بە ڕۆشنی بەرمگنۆ دەوڵەتەکو تەیب ئەردۆغانی  ٣١و ئادارینە ورچنیەیەکانە دۆڕیا و پلێش وەستەرە. شەرعیەتی سیاسیی هەقەتینوو دەوڵەتەکەیش نەمەن. ئەردۆغان ئەگەر تۆزێو  کەرامەت و کەمێو زانیارییش بارەو دیموکراسییوە بیێ، بەرەبەیانوو  1و نیسانی دەس کێشێوە جە هەرمانێ و بەرەو سیاسەتی ڕووەو تورکیایرە کەرێوە، بەڵام تەیب ئەردۆغان ئی هەرمانێشە نەکەردە و ئا هێزێ  ٣١و ئادارینە دا سەرکەوتێ، ئەردۆغانشا ناچار نەکەرد دەس کێشۆوە. چانەیە زیاتەر، دەسەڵاتوو ئیساتێ جەهەپەی جیای ئانەیە داواو دەسجەهەرمانکێشتەیوەی ئەردۆغانی بکەرۆ، هەوڵێ شەرعیەتدای بە دەسەڵاتی فاشیستی و ئینسانکوشی ئەردۆغانی مدۆنە. دیدارەکاو ئۆزگور ئۆزەلی چەنی تەیب ئەردۆغانی بەروزێ ئی ڕاسییەینێ.

ئی دۆخە دەسەڵاتوو تەیب ئەردۆغانی سەروو پایاوە مازۆوە و  پەوکای پێویسش بە قوەڵابییەیوەی جەنگی دژە فاشیستی هەن. پێسەو پێویستێێوی مشۆم دەسەڵاتوو تەیب ئەردۆغانی بە جەنگی دژە فاشیستی دلێنە بشۆ. باروو ئینەیچە مگنۆنە سەروو شانەو گەریلای و گرنگیی جەنگوو گەریلای زیاتەر مکەرۆ. ئینەیچە پاسە مکەرۆ جەنگوو گەریلای کەشەکاو کوردستانینە بفاڕیۆوە پەی شارە گەورەکاو تورکیای. چالاکییەکاو گەریلای هەرێمەکاو پارێزنای مێدیاینە ١٦و نیسانیوە تا ئیساتێ ئی هەرمانێشا کەردێنە. بە مانێوی تەرە ئانە گورزێوە قەوەتا جە فاشیزموو ئاکەپەی و مەهەپەی دریان و مبۆنە بایسوو دلێنەشییەی فاشیزمی.

گەریلاکاو ئازادیی کوردستانی ٢٤سەعاتە سەروو خەتەو فیداییوە مژیوانێ و درێژە بە جەنگی و کۆشان مدانێ. سەرەڕاو ئانەیە ئا هەلومەرجە سەختە، جە کۆشیای ئارەیدی دیموکراسیینە پەی کوردستانی و تورکیای ئینێ هەوڵێنە. بێگومان ئینەیچە گەشمەردەبییەیش چۆوە مگنۆوە. 

ئاشکران کە گەریلاکاو ئازادیی کوردستانی سەروو خەتەو ڕابەر ئاپۆی و گەشمەرداوە ملا. سوپاو گەشمەردا سەرمەشقایەتیی گەریلای مکەرۆ. گەشمەردێ گرد یاگێنە و وەختێنە  گەورەتەرین سەرچەمە و هێزنێ پەی گەریلای. ئاڤینارا خەڵکوو ئامەدی و ڕووکەنە خەڵکوو بۆتانی دووێ گەشمەردێ سوپاو گەشمەردانێ، کە هجووماو ی داگیرکەریینە ٦و نیسانینە کەشوو لێلکانینە خاکورکنە لوێ کارەوانوو نەمراوە.

گەشمەرد ئاڤینارە  جەئەدابیێ ئامەدینە و دماو ئانەی فرەو مەیدانەکاو گەریلاینە کۆیێنە، پێسە  فەرماندێ خاکورکی و هەم جە پەروەردەکەرەی فرەو گەریلاکانە دەورش گێڵنان و ساڵەو ٢٠١٧ یوە چەنی فەرماندەو ئەیالەتوو گەشمەردە ئاگری جەنگێوی بێوێنەش دژوو هجوومەکانە کەرد. پەی گرد لایێوەش نیشانە دا، کە ژەنی ئازادە هێزێوی خوڵقنەر و سەرچەمەو ژیواینە. کناچی بۆتانی، گەشمەردە ڕووکەنە بەردەوام مایێ هێز، مۆڕاڵ و یارای بیێنە پەی ڕەفێقەکاش.

پیویسا خاس چی دووە جەنگەوانا و فەرماندە بەنرخاو یەژا ستاری بیاومێنە و یادێشا بکەرمێوە، کە بە کۆشیایشا ژیواێوی ئازادشا خوڵقنا، نەک بە کەلیمێ بەڵکوم بە کەسایەتی و کرداروو وێشا. هێزی هەقەتینوو ژەنێشا ئاشکرا کەرد. سەلەمناشا کە ژییواێوی ئازاد بەبێ وێپارێزنای مەحاڵا. ژەنێوی ئازادە، گەلێوی ئازاد و ئینسانی ئازادشا جە گرد چێوێوە بە زیاتەر و بەنرختەر زانا. گردما قەرزدارێ ئا کەسانمێ، پێویسا بە شۆنیرەلوای و بەدیئاردەی ئامانجەکاشا ئی قەرزەیە بدەیمێوە. پی بۆنەوە جە کەسایەتیی گەشمەردە ئاڤینارێ و گەشمەردە ڕووکەنێنە گردوو گەشمەرداما بە ڕێز و منەتدارییوە یادێ کەرمێوە.

سەرچەمە: ئۆزگور پولیتیکا