ئاویرکەوتەیوە دارستانەکاو وەرکەوتوو کوردستانینە بەردەواما
دارستانەکاو دەوروبەروو شارووسەلاسی باوەجانینە یەرێ ڕوێ چێوەڵتەر گڕەشا گێرتە، گومانە مکریۆ ئاویرنیایوەکەی دەسش پەشتیوە بۆ.
بە ئامای فەسڵوو هامنی، چەنی بێباکیی بەشێو جە هاموەڵاتا، هێزەکاو دەوڵەتوو ئێرانی و بەکرێگیریایا، کە بە دیدگایێوی ئەمنییوە مدیا پەی سرووشتی سەوزی و دڵڕفانوو زاگرۆسی وەرکەوتوو کوردستانینە، بە دەسی ئەنقەس ئاویرش وەرمدانە. حەفتەی وەڵێن دارستانەکاو مەنتێقەو جوانڕۆی و پاوەی ئاویرشا گێرت و نزیکەو حەفتێوی بەردەوام بی. بە قسێ خەڵکوو مەنتێقەکەی ئی ئاویرە بەفرەیی هێزەکاو دەوڵەتوو ئێرانی و بەکرێگیریێ بە ئەنقەست مکەراشۆ. بە پاو ڕاپۆرتەکا، لاو کەمیوە ٢٠٠ هێکتارێ جە دارستانەکاو جوانڕۆی بیێنێ بە بووڵە، قەبارەو زەرەرەکاو یاگەکای تەری هەڵای ئاشکرێ نەکریێنێ.
بەپاو ئا زانیارییا دەسوو ئاژانسەکەیما کەوتێنێ، ٣ ڕوێ چێوەڵتەر دەگایەکاو سوورە (دە سور)ـوو سەر بە سەلاسوو باوەجانیینە ئاویر کەوتەنۆ.
وەختێوەنە هێزەکاو ئێرانی هیچ هەوڵێوەشا نەدێنێ پەی کۆنتڕۆڵکەردەی ئاویرەکەی، گەنجێ ژیوگەپارێزنێ و دەگانشینێ بە دەرفەتی کەموو وەروودەساشاوە تاواشا ئاویرەکەی کۆنتڕۆڵ بکەرا.
هاموەخت زانییان، چند سەعاتێوی چێوەڵتەر، دماو یەرێ ڕوا و دماو کۆنتڕۆڵکەردەیش، واوەی ئاویر کەوتۆە و دارستانەکێ مسۆچیای مسۆچیانە.
بەپاو ئا زانیارییا خەڵکیوو یاگەکاوە دەسێکەوتێنێ، گومانی مکریۆ ئاویرەکێ بە ئەنقەست هێزەکاو دەوڵەتوو ئێران و بەکرێگیریێکێ بکەراشاوە.
کۆمیتەو ئیکۆلۆژیی کۆدار پێوەس بە ئاویرەکاو وەرکەوتوو کوردستانیوە، داواش وەنەو گەل و ڕێکوزیا و ئیکۆلۆژییەکا کەردە، دژوو ئی ڕووەدایە کارەساتبارەیە وێشا ڕێک بوزانێ و دەور بگێڵنانێ.
