کۆمەڵەو پارێزنەراو ئازادیی (ئۆهەدە) سەبارەت بە گۆشەگیریی ئیمرالی داواکارییش ئاراستەو وەزارەتوو دادی کەردەبێ. دماو ئانەیە هیچ جوابێوەش ورنەگێرتەن، داواکارییش پێشکەش بە سەندیکاو پارێزنەراو شاروو وانی کەرد.
ڕابەروو گەلوو کوردی عەبدوڵا ئۆجالان، عومەر خەیری کۆنار، وەیسی ئاکتاش و حامیلی یڵدرم زیندانوو ئیمرالیینە دۆخێوی فرە قورسنە گۆشەگیرێ کریێنێ، ماوەو ٣٩ مانگان هیچ زانیاریێوەشا نیا و ڕا نمەدانێ نادەن بنەیانە و پارێزنەرەکێشا دیدارشا چەنی بکەرا. سەبارەت بە گۆشەگیریی "ڕەها"و ئیمرالی، هەزار و٣٠٠ پارێزنەرێ داواشا وەنەو وەزارەتوو دادی کەردێنە، بەڵام هەڵای هیچ جوابێوەشا نەدریانۆ. پی بۆنەوە ٧٤ ئەندامێ لەقیوو کۆمەڵەو پارێزنەراو ئازادی (ئۆهەدە)و شاروو وانی داواکارییشا پێشکەش بە سەندیکاو پارێزنەراو شاروو وانی کەرد.
مەهتاب ئیشیکە، هامسەرۆکەو لەقوو وانوو کۆمەڵەو پارێزنەراو ئازادیی، وەڵێ داواکارییەکەینە وتارێوی کوڵش پێشکەش کەرد و ئاماژەش پانەیە دا، کە هەڵای هیچ زانیارییێوە سەروو ڕابەروو گەلوو کوردی عەبدوڵا ئۆجالانی و زیندانییای تەروو ئیمرالی بەدەس نەیاوان و واتش: "بە مەبەستوو چەمپەنەکەوتەی چنی موەکیلەکەیما، بەرێز عەبدوڵا ئۆجالانی کانوونوو دووەمینە هەزار و ٣٠٠ پارێزنەرێ ٣٥ نویسگاوە داواکارییشا پێشکەش بە وەزارەتوو دادی کەردەن. حەرچندە ٦ مانگێ سەروو داواکارییەکارە ویەردەن. بەڵام هەڵای حیچ جوابێوەشا نەدانۆ. تا گۆشەگیریی سەروو بەرێز ئۆجالانی وربگێریۆ و چەنی موەکیلەکەیما جەمێ بیمێوە، داواکاری پێشکەش بە سەندیکاو پارێزنەراو وانی مکەرمێ. ئیشیک سەرنجەش پەی چالاکیی زیندانییا چوارچوەو "ئازادیی پەی عەبدوڵا ئۆجالانی، چارەسەری سیاسی پەی کێشەو کوردی" زیندانەکانە کێشتە و واتش: "گۆشەگیری ئیمرالییوە دەسش پەنە کەرد و گردوو زیندانەکانە دا وەڵا بییۆ. هاگادارێ نییەنمێ زیندانەکانە چێش مقۆمیۆ."
