ماوێوەن تورکیانە پڕوپاگەنڎەو ئاشتی گەرما، ئێ ئی پڕوپاگەنڎە چانەی مشۆ جگە جە دروێوە گەورۍ هیچی تەر نەبۆ، ۋەرو ئانەی، نە بەرەو زینانەکا کریانۆ و نە بوار بە دیڎارو ئاپۆی دریان، نە پەلامارەو سەرو کەشەکا کورڎەسانی مردان، ئی پڕوپاگەنڎە تاک لایەنە وەڵۍ گوزارشتەو عەنبەرین زەمانی و وەڵۍ مەرحەباییەکە و باخچەلینە ئەردۆغان و ئاکەپە وستشا دلۍ میدیایۆ، من هەر ئا کاتە شۊنیرەلوایم پەی ئانەی کەرڎ کە ئاخۆ چێوی چانە هەن یان نا، هیچ حەقەتینێوە بیەیش نەبۍ.

بانگەشەو ئاشتی قسۍ ڕووتۍ نیەنۍ، مشۆم بڕۍ نیاز پاکیش چنەبۆ، تورکیا تا ئیساتۍ هیچ ئاماژێوە ئاکاریش پەی ئاشتی نیشانە نەڎان، سەرەڕاو ئانەی ٢٥ ساڵێن ئاپۆ ئینا زینانو ئیمراڵینە، ماوێوە فرەیچا بەرەو ۋینای و چەمپنەکۆتەی ڕووەشەرە وزیانەرە، ڕۆنیا چێگەو چا زۋانی کوردی کۆت و بەند نەکریۆ، ڕا بە ۋەنای کوردی نمەڎریۆ، سەرو واتەی گۆرانی کوردیۍ گەنجۍ و جوانۍ کوردی کوشیا، زینانەکۍ پەڕێنۍ جە ئازادیوازا، کەچی چەولایچۆ پڕوپاگەنڎەو ئاشتی مکریۆ، کورد حەجگیز بەرەو ئاشتیش نەڎان پۆوە، ئانە دۆڵەتو تورکی و ئەردۆغان و ئاکەپەنۍ گەرەکشانە جڵەوو جەنگی و ئاشتی جە دەسو ئاڎیشانە بۆ، ئینەیچ حەجگیز بە ماناو ئاشتی نمەڎۍ.

گرڎ ئاشتیێوە پەنەوازش بەزەمینە سازیا، ئینەیچ جە ئاژێوە چیمنەنە جە مابەینو جمېیەرو ئازادیوازی کوردی و دۆڵەتو تورکیاینە، زیاتەر گنۆ ئەستۆو دۆڵەتو تورکی، چونکی ئانەی ئەرکی فرەتەرو ئاشتی گنۆ ئەستۆش دۆڵەتا نەک ئا هێزەی جەنگ پەی مەنەیۆ ئازادی مکەرۆ، بەڵام تورکیا پەی ئاشتی چێشش کەرڎەن، ئیساتێچ تەنانەت وێنەو جەنگەوانۍ یان گەریلێوە گێرە پێشمەرگێوەیچ دلۍ مۆبایلینە بوینۆ گێچەڵەو دنیێت پنە مکەرۆ، نەک هەر دلۍ تورکیاینە، گێرە جە ئۆروپایچەنە بەردەوام پەرە بە قینۍ و توڕەیی مڎۆ ۋەرا ۋەر بە کوردی، کورد هەن ئۆروپایچەنە تەرسەو فاشیزمینە نمەیارۆ بەکوردی قسۍ بکەرۆ، کەواتە ئاشتی چێشی؟.

من شۆنیرە لوایم پەی ئا مژاریە کەرڎ چن سەرچەمێوە پەکەکەی بەنەرێ جوابشا داوە، گوایە چێوی چامنە نیا ئانە جگە جە دروێوە دۆڵەتی زیاتەر نیا، چنی ئانەیچ ئاڼەی من بزانو پەکەکە حەجگیز بەرەو ئاشتیش نەوستەنەرەو هەمیشە ئامادەو ئاشتیا، ئێ هەر ئیساتۍ دۆڵەت جە گرڎو سەرنیشتوو کورڎەسانی، هەرمانە پەی جە ویربەردەیۆ زۋانی کوردی مکەرۆ و ئا زۋانیە پېسە زۋانۍ نەفرەت ۋنەکریای نیشانە مڎۆ، ئانەیچ ملۆ خانەو قڕکەردەی شوناسیوە، ئایا ئاشتی دلۍ ئا ئاژەینە هیچ ئەرزشێوەش هەن، ئینە پرسیارێوە ساڎێنە و هیچی تەر.