ماوەو چن ڕوێوەن ژیوگەو جوانڕۆ و پاوەی جە وەرکەوتو کورسانینە سۆچای سۆچۆ. ڕۆو پەنج شەممەی وەڵینیۆ ئێرێوە گەورە و فراوان جە دارسانەکا جوانڕۆ و پاوەینە کەوتەنۆ. سەرەڕاو کۆشیایێ فرەی جەلایەنو ژیوگە دۆساوە پەی کوشنایۊ و ئێرەکەو جوانڕۆ و پاوەی جە شارەکا مەریوانی و سنەی و ڕەوانسەری و چن یاگێوتەریۆ بە ئامانج و کوشنایۆ ئێرەکەی ڕووەشاکەردە شارو جوانڕۆ و پاوەی. ژیوگە پارېزنۍ و گلیرگەو جوانڕۆی و پاوەی پا پیویسییە کەماو ویشاوە تەمام و تواناو وېشا وستەن هەرمانە تا ئێرەکەی خامۆش کەرانۍ. هەرپاسە ژیوگە پاریزنەکۍ داوا جە گلېرگەو وەرکەوتی کەرانۍ کە هامکاریشا بکەرانۍ تا بە گرد لێوە ئێرەکەی خامۆشکەرانۍ. ساڵانە ئێر گنۆوە جە وەرکەوتو کورسانینە، بەشێوە فرە چی ئێرکەوتەیۆ پەی سیاسەتو دوژمنکارانەو دەسەڵاتی گێڵۆوە. بە پاو ئا زانیاریا کە دەس کۊتېنۍ سۆچناو باخە زەیتوونێوە بیەن جە داڵاهۆنە، کە جە دماو ٣٠ی ساڵا تەمەن و دار زەیتوونەکا جە لایەن و ڕێکوزیاو کولتوورو نیعمەتی زەحمەتکێشی سەوز کریابی جە دەگاو حەسەن سلێمانی جە هەریم و داڵاهۆی جە لایەن و کەسێوە ئێر دریان. هەر پاسە ماوێ چێوەڵتەر ئێر وەردریا زەمینە کوشتووکاڵییەکا و زەرەرێوە فرەش یاونان بە ژیوگەو هەرێمەکەی.

کەوتەیۆ ئێری جە فەسڵ‌و هامنینە بییەن بائیسو ئانەی کە ژیوگەو کورسانی زیاتەر ڕوو وە ڕوو جە بەین شییەو درەختەکا و تەماموو ئا گیان جە بەرایجە، بۆوە کە ژیوا. جە لاێوەتەرۆ بەردەوامکەردەو پەلامارداو سووپا دڕندەکی دەوڵەتو ئەرەگیرو تورکیایج، بە ئێر وەرداو بڕیەیۆ درەختەکا زاگرۆسی و بەکار ئاوردەو چەکو کۆکوش‌و کیمیاوی، ئینەی تەر ژیوگەو کورسانیش ڕوو وە ڕوو جە بەین بەردەی کەردەنۆ. پۆکەی پەنە وازا جە هەر هەرێمێنە ڕێکوزێ ژیوگە پارێزی وەشیکریانە تا ژیوگەو زاگرۆسی بە زەریفییەکەو ویش مەنۆوە.