دەنیز پۆیرازە ٣ ساڵێ وەڵتەر فاشیستێوی تورکی بە چەمداریی پۆلیسوو تورکی کوشت، ئارۆ ئیزمیرنە یادش کریاوە. حالیدە تورکئۆغڵو واتش، کە دەنیزە ڕەمزوو کۆشیای ژەنا و گەلوو کوردینە و ئەرەیاوناش: "وەعدما بە دەنیزێ دان، ئاشتیی پەی وەڵاتی مارمێ."
بە بۆنەیو یەرەمین ساڵەو کوشتەی دەنیز پۆیرازێوە، بارەگاو دەم پارتیینە ئیزمیر، مەراسیمێوی یادکەردەیوە کریا. بنەیانەو دەنیز پۆیرازێ، ئەدایاو ئاشتی، چالاکاو تەڤگەروو ژەنە ئازاد (تەژەئا)، قسەکەرەو ئەنجوومەنوو ژەناو دەم پارتی، هالیدە تورکئۆغڵو، پەرلەمانتاروو موشی سێزای تەمەلی، نوێنەروو دەم پارتی ئیزمیری، نوێنەروو پارتە سیاسییا و سەندیکاکاو کرێکارا و بەشێوی فرەو هاموەڵاتا بەشدارییشا مەراسیمەکەنە کەرد. بەرنامەکە بە خولەکێو ڕێزگێرتەی پەی یادوو گەشمەرداو ئازادیی دەسش پەنە کەرد.
مەراسیمەکەنە ئەداو دەنیزێ، فەهیمە پۆیرازە، قسێش کەردێ و واتش: "دەنیزە پەی هەمیشەی دەنیزەو گەلوو کوردینە، دەنیزە هەمیشە واچێ من کناچێ گەلوو کوردینا. دەنیزە کەسێوی ئازادە بێ. لکەدریێی گەلی و وڵاتەکەیش بێ، بەردەوام سەروو ڕێبازوو هامڕایاشەو بێ."
هەرپاسە سێزای تەمەلی قسێش کەردێ و واتش، کە هێزەکاو پەشتەو ئا تۆمەتبارەیە کە دەنیزەش کوشتێنە مشناسانێ و واتش: "دەنیز پۆیرازە ڕەمزەو کۆشیای ژەنا و گەلوو کوردینە. ئێمە وەعدما دان بە دەنیزێ، ئاشتیی پەی وەڵاتی مارمێ. ئەگەر دیموکراسی نارمێ ئاشتیی نارمێ، ئانە وەڵاتوو وێما جەدەس مدەیمێ. ئینێ کوشتەیێ سیاسیێنێ. ئێمە ساڵەو ١٩٩٠یوە زانیاریما سەروو کوشتەی دەنیزێ هەن، پەرسەو گردوو ئی کێشا گۆشەگیریی ئیمرالیین. ئێمە ئاشتی و دیموکراسییما گەرەکەن. پێویسا دژوو گۆشەگیری و دژوو جەنگی مدرمێ."
دماو وتارەکا کوڵەفیلمێو دەربارەو دەنیز پۆیرازێ نمایش کریا. دمایی کۆڕوو ژەناو دەنیز پۆیرازێ ئامێ سەروو شانۆی و بە گۆرانیێ کوردیێ سەماشا کەرد. یادەکە بە دروشموو "ژەنی، ژیوای، ئازادی"ی تەمامیا.
