دەسەڵاتداری فاشیستو ئاکەپە-مەهەپەی دماو ئانەی جە هۆرچنییە دلێینەییەکانە تووشو شکسی و دۆڕیای ئاما، دماو ٧ مانگا هەوڵمڎۆ جە ڕاو سیاسەتو قەیومیوە دەس سەرو ئیراڎەو گلێرگەیرە بگێرۆنە، بە سەپنای قەیومی سەرو شارەوانییە کوردییەکا دەم پارتیرە گەرەکشا وێش جە قەیرانو دلێنە بەردەی پارێزنۆ، جە وەرا وەرو سەپناو سیاسەتو قەیومینە گەل ئینا مدرامانەنە و رژدا سەرو هۆرگێرتەیۆ مافەکا وێش. هامشانو گەلو کوردی بەشێ جە ئازادیوازا و لایەنە سۆسیالیستەکا تورکیای کەم تا فرە جەخت سەرو هامپەشتی ئیراڎەو گەلو کوردی مکەراوە. چا بارۆ سەرۆکو گردی پارتو تەڤگەرو ڕەنجی، هاکان ئۆزتورک پەی ئاژانسیما قسێش کەردۍ و ئاماژەش پانەیە کەرڎ کە دەسەڵاتداری پاسە وێش نیشانە مڎۆ کە ئینا هەوڵو چارەسەرکەردەو پەرسەکا وڵاتینە، ئانەی سەرۆکو پارتو ڕەگەزپەرسی مەهەپەی، دەوڵەت باخچەلی کەردش جۆرێوەن جە ناچاربیەو دەسەڵاتی پەی هەنگامنیای بەرەو چارەسەری.

ئۆزتورک ئاماژەش پانەیەدا کە هەوڵەکۍ باخچەلی پێسەو مژارێوە وەرفراوانو 'بییەی' تەماشە مکریۆ و واتش: "بەڵام قۆڵی دووەمو دەسەڵاتداری نیا چا ئاستەنە جە ئاژەکەی پێسەو پەرسێوە وەرفراوانو 'بیەی' بوینۆ و بە پاو ئانەی جمۆوە. بە ئەگەرێوە فرۆ سەپنای قەیومی ڕەگەزی قۆڵو دووەمو دەسەڵاتداریین. گرنگ نیا لاشاوە پەرسو کوردی ئینا چ ئاژێوەنە، دەسەڵاتداری پێسەو سەروەری و دەسوستەی قەوەتی مامەڵە مکەرۆ. بەردەوامیش پنە مڎۆ."

جە بەردەوامینە ئۆزتورک دەسنیشانشکەرد سەپناو قەیومی سەرو شارەوانییەکارە پاشێلکەدەی بنەماکا دیموکراسیینێ و واتش: "قەیوم دڎان نەنیاین بە یاسا و ماف و دەستوری بنەڕەتیرە. گەل دژو ئینەی ئینا ئەرەکۆشاینە و پارێزناو شارەوانییەکا گەلی ئەرکو گرڎیمانە."

'ئەرەکۆشای بەردەوام پەنەوازیش بە هامپەیمانی هەن'

جە دماینە ئۆزتورک ئاشکراشکەرد مشۆم سۆسیالیستا تورکیای جە دژو قەیومی، هامخەباتو کوردا بانۍ و ئانەش وات: "مشۆم پارێزنای گەلا و پارێزنای دیاریکەردەی چارەنویسی نەتەوەیی بۆنە. جە وڵاتەکەمانە دووێ پەرسێ سەرەکیێ هەنێ، پەرسو چینایەتی و پەرسو کوردی. مشۆم سۆسیالیستەکۍ بە ئاشکرا دڎان پانەیرە بنیا و جە دژو سەپنای قەیومی، هامخەباتۍ گەلوو کوردی بانە. پەی ئەنجامدای کۆششی پێوەرەیی مشۆم هامپەیمانی جە بەینو تەڤگەرو کوردی و سۆسیالیستانە بۆنە. ئانەی دماڕۆو وڵاتی ئازاڎ مکەرۆ کۆششی پێوەرەییا."