ڕووکەن نەغەدە ئەندامۆو دەسەو راوەبەری گلێرکەو ژەنا ئازادی وەرکەوتو کوردەسانی (کەژار) سەرەتا ٢٥و ئۆکتۆبەری ڕۆو جەهانی وەرەنگاربییەیۆ تنوتیژی دژو ژەناش جە تەمامو گەشمەرڎا کە چا ڕێنە گیانشا بەخشا موبارەک کەرد و پی جۆرە دەسش بە قسەکاش کەرد: " ٢٥و ئۆکتۆبەری ڕۆو وەرەنگاربییەیۆو تنوتیژین دژو ژەنا، بەڵام دماو ئانەی کە ژەنی گنانە دلۍ ئەرەکۆشای و جەنگ  وەرا وەرو ئا زهنییەتەینە ڕاوەبەر مکەرا ئیتر ئا ڕووە بۆ بە ڕۆو ئەرەکۆشای ژەنا.

ژەنا جەسەو وێشا ڕازناوە، تۆمێوە ئەرەکۆشایشا نیا کە ئارۆ تەڤگەری ئاپۆیی، تەڤگەرو ژەنا خاوەنداریش ۋنە مکەرۆ و سەرو ئا تۆمەیۆ سەوز بۆ. ئارۆ کە ئینایمی سەدەو ٢١ینە ژەنی بە شێوێوە فراوان چالاکی مکەرا، دەورو یۆیرە کۆباوە، ڕێکوزیێوە گردی ژەنا درووس بییەن، سەرو کۆنفیدراڵیزمو ژەنا وتووێژ مکەرا، سەرو ڕێکوستەو سەروازی ژەنا وتووێژ مکەرا سەرو بنەماو زانستی وێشا بە ڕێکوستەی مکەرا. ئیتر ژەنی  سەدەو ٢١ینە یاوێنۍ ئاستێ کە بە سەربەرزییۆ متاوا واچا مدرامانو ژەنا، سەرهۆردای ژەنا و ئەرەکۆشای ژەنا موبارەک مکەرا. بەتایبەت بە بەرکەوتەو تەڤگەری ئاپۆیی، تەڤگەرو ژەنا شۆڕشگێڵنی، سوپابییەو ژەنا، زانستو ژەنا (ژنۆلۆژی) ئانۍ گرد دەسکەوتێنی و خاوەنداریشا چنەکریۆ جە ٢٥و نۆۋەمبەرینە"

'فەلسەفەو ڕابەر ئاپۆی بییەن بە ڕۆشنایێ'

ڕووکەن نەغەدە باسش چانەیە کەرد: "جە تاریخەنە تا ئیسە ژەنی نە جەڕۆو ڕوحییۆ نە جە ڕوو فکرییوە تەسلیمو ئا زیهنییەتەیە نەبییێنۍ، بەبەرکەوتەو ڕابەرئاپۆی ژەنی فۆڕم و ڕەنگێ تەرش هۆرگێرت و گێڵێوە سەرو کرۆکی حەقەتینەو وێشا کە چنین جە وەرا وەرو ئا زهنیەتەینە گژیانە، ئەرەکۆشای مکەراو وهامکات وێشا بە ڕێکوزتەی مکەرا و ژیوێوە ئازاد و بەمانا ئاوا مکەرانە. تەڤگەرو ژەنە ئاپۆیی پا ڕەنگە بە بەردەوامی ئینۍ وێڕێکوزتەینە.

ڕابەر ئاپۆ سەدەو ٢١ ی پێسەو سەدەو یەکسانی ڕەگەزیی و سەدەو شۆرشو ژەنۍ پێناسە کەردەبۍ، وەرو ئانەی سەربەرزێنمێ پا ئەرەکۆشایا کە کریێنی بە دژواری و بە زەحمەتیێ فرە بە دەس ئامێنۍ، قوربانی گۆرە دریان پێسەو هەمڕێما ڕۆزا،  سارا، شیرینۍ جە زینانەکانە تا ڕۆو ئارۆی جە کەشو، شار و لادەگاکانە.. ژەنی سەرەش هۆربڕیەن و بە فەلسەفەو ڕابەر ئاپۆیۆ تاریکش ۋېیەرنان، پۆکەی ئارۆنە یەک دەنگی و یەک ڕەنگی ژەنا وینمێنە."

'ئەوینۍ حەقەتینەو ژیوایێ ئازادی'

ڕووکەن نەغەدە ئەرەیاوناش: " ڕابەر ئاپۆ کەسایەتی ژەنێ و پیای ئازایش بەشێوێوە خوڵقنا کە پێناسەکەش متاومێنە جە کەسایەتی هامڕێما ئاسیۍ و ڕۆژگەرینە بەدی کەرمێنە پێسەو ئا چالاکییە فیداییەی کە ئەنجامشدا، چالاکیەکە ئنە گەورەو زەریف بۍ ئینسان نمەزانۆ چنین وەسفش بکەرۆنە، فرە بێباکانە بێ ئانەی حیساب پەی دووژمنی کەرۆنە، بە حەفلێوەو هۆرپڕێوە ئازادی پێوەرەیی بە دیسیپلین و وەشەویسیۍ گەورەۆ وێشا خزنا دلۍ دڵو دووژمنی و چالاکیشا کەرد. تاومێنە وەشەویسی حەقەتینەو ژیوایێ ئازادی جە کەسایەتی ژیوای و چالاکی هامڕایامانە وینمۍ. وەرو ئانەی جارێوەتەر سەرەو وێما جە وەرا وەرو ئا چالاکیەینە و ئاستو فکری و ئازادی هەمڕایامانە منامنمێرە، پەی ئانەی خاوەنداریشا چنە بکەرمێنە مشۆم وێما بیاونمۍ بە ئاستو کەسایەتیشا و گردو ژەنا خاوەنداریی چا چالاکیەیە بکەرانە، کە پەی وەشکەردەی ژیوایێ ئازادی ئا چالاکیەشا کەرد."

'گرڎ کەسش وست دلې ئەوەکۆڵیای'

ڕووکەن نەغەدە جە بەردەوامینە باسش جە ئەنجامەکا فەلسەفەو 'ژەنی ژیوای ئازادی' جە وەرکەوتو کوردەسانی و ئێرانینە کەرد و ئینەش وات: " شۆڕشو 'ژەنی ژیوای ئازادی' بە تەمامی ئیرادە و هێزی و گەلیش بەروستۆ کە گومش کەردەبۍ و هامکات وەنە پەرسایۆیۍ بۍ پەی ژەن و پیای. کڕێڵێوە بۍ پەی پەرسایەکا؛ من کێنا، چنین ژیوای مکەرو، پەیچی و چکۆ ژیوای مکەرو، سەردەسی چێشا، تنووتیژی چێشا و...هتد، گرڎ کەسش وست دلۍ گێڵای ئا پرسیاراوە.

هونەرمەندێش وستۍ دلی ئا ویرکەردەیۆ کە ئاخۆ هونەرمەنەکە خزمەتو چێشی مکەرۆ، ئینسانی زانا بە هەمان شێوە کۆتۍ ئەوەکۆڵیای کە زانست چێشا، زانستو گلێرکەی خزمەتو چێشی مکەرۆ، دۆڵەت ئا زانستەشە چن وستەن خزمەتو وێش، گرد کەسێش وست دلۍ پەرسای و ئەوەکۆڵیایۆ.

بنەیانەکێ کۆتێ پەرسای و ئەوەکۆڵیایۆ کە ماناو بنەیانەی چێشا، ڕێخەش چکۆوە مێ و خزمەتو چێشی مکەرۆ. دەورو ژەنێ دلی ژیواینە چیشا، کناچۍ و کوڕ چ دەورێشا هەن، خۆنکارۍ بە هەمان شێوە حسابو ئانەی مکەرا کە من چنین وانانم و چێش فێرەبیەنا، چێوێ کە فێرش بییەنا پەی خزمەت کەردەی ژیواین یان پێسەو کارمەندێ خاسی پەروەردە بونە پەی خزمەت کەردەی پا سیستەمەیە."

'ئیتر گرڎ کەسۍ ئینا هەڵوێس ورگێرتەینە'

ڕووکەن نەغەدە ئەندامۆو دەسەو ڕاوەبەری کەژاری، جە درێژەو قسەکاشەنە باسش جە ویرو و ڕامانو ڕابەر ئاپۆی کەرد پانەی فەلسەفەو ڕابەر ئاپۆی جکۆ بۆ چا یاگێنە فاڕیایی وەش بۆنە و ئانەش وات: "ڕژیمو ئێرانی ئیتر بێچارە بییەن و دماین هەناسەکا وێش مڎۆ، ڕێبازێ نەمەنەن بەکارش نارۆ پەی ڕزگارکەردەو وێش، قەیرانێ کە هەن، فشارێ کە سەرو گلێرکەیۆ، سەرو ژەنا و جواناوە بییەیش هەن. بە فۆڕمێ وشک سەرو نامێ ئاینی سەرو گلێرکەیۆ بەرۆش ڕاوە، بەڵام ئیتر گەل ڕووەی حەقەتینو ئا دۆڵەتەیش پەی بەرکۆت و بەبێ تەرس هەڵوێس نیشانە مڎۆ و ئەرەکۆشاو وێشا مکەرا. زانانە قوربانیش گەرەکا بەڵام ئەرەکۆشاو وێشا مکەرا و بێ هەلوێس نمەمەنا و گیانو وێشا بەخشا پەی ئانەی شۆرش سەرگنۆ و ئازادی بەدەسبارا."

ڕووکەن نەغەدە ئەندامۆو دەسەو ڕاوەبەرایی گلێرگەو ژەنا ئازادی وەرکەوتو کوردەسانی جە دماینو قسەکاشەنە هۆرسەنگنایش پەی ئەرەکۆشای و کەمپینەکا کەژاری کەرد پی جۊرە دمایش بە قسەکاش ئارد: " کژار چی دووە ساڵەو دماینە پا ئەرەکۆشایەی بەرۆش ڕاوە کەمپینەکەش "نا پەی جەقەنارەدای بەڵێ پەی ژیوای ئازاد"ی ئەرەیاوناش کە جە گرد یاگێ  جەهانینە خاوەنداریەتیش چنەکریۆ گردو ئازدیوازا جە دژو تنوتیژی دژ بە ژەنا گەرەکشانە بەشداریش دلێنە بکەرا، چونکی کەمپینەکەو کەژاری ڕێکوستەو ژەنا بە بنەما گێرۆنە."