گوڵستان گولۆ، واتەواچەو کۆمیتەو پەروەردەو کۆنگرە ستاری ئەرەیاۋناش، کە ۋێپارێزنای ژەنا پەشتی بە ئەنەیاوای و بەڕێکوستەی بەسۊنە و ئاماژەش پانەی دا کە ژەنی ئەنەیاوۍ، ئا ژەنێنە کە ۋێش پارێزنۆ.
واتەواچەو کۆمیتەو پەروەردەو کۆنگرە ستاری، گوڵستان گولۆ، سەبارەت بە گرنگی پارېزنای ژەنا، میکانیزموو پەروەردەو ئیساتۍ و دەورو پەروەردەی پەی قەوەتکەردەی پارېزنای ژەنا چنی ئاژانسوو فوراتی قسېش کەردۍ.
گوڵستان گولۆ ئانەش وست ڕووە، چنی شۆڕشوو ۋەرنیشتی، میکانیزموو پارېزنای یاوا بە بەرزتەرین ئاست و ئەرەیاۋناش، ژەنێوە کە سەرمەشقایەتی گلېرگەی مکەرۆ، پارېزنای گلېرگەی بە بنەما مگېرۆ و کۊشیای پەی ژیاۋایۍ ئیکۆلۆژی مکەرۆ، سەرو ڕێخە و ڕیشەو ژەنۍ ئەرەکۊشای پەی سەر جە نۆ ژیۋایۆ بەردەوام بیەن.
گوڵستان گولۆ ئەرەیاۋنۆش، پەی مسۆگەرکەردەی ۋێپارێزنای ژەنا، واتە پەی ئانەی ژەنی خاوەنوو ۋێش بۆ، زانابۆ، ئەنەیاوۍ بۆ و ۋێش ڕاوەبەرە بکەرۆ، پەی قەوەتکەردەی ئیرادەو ۋێش، بە ۋەروچەمگێرتەی میراتی کولتووری ۋێپارێزنایش، پەناش پەی گرڎ ڕا و ڕێبازێوە بەردەن و واتش: "جە ۋەرا ۋەرو فەرز و فشارەکا نەریتوو گلېرگەی و بنەیانەیی دژوو ژەنا، ۋەربەسش نیانرە و هامکات چنی ئینەیچ، ئەرەکۊشایش پەی وەشکەردەی گلېرگێوە دیموکراتیکی ئەنجامدان.
گوڵستان گولۆ سەبارەت بە سیستەمو پەروەردەی پەی ئەنەیاوای و ۋێپارێزنای ژەنا، واتش: "کۆمیتەو پەروەردەیی کۆنگرە ستاری جە ششەمین کۆنفرانسوو کۆنگرە ستارینە، پەی ئانەی بتاوۆ گلېرگەی جەچوارچێوێوە دیموکراتیکەنە پەروەردە و بەڕێکوستەی بکەرۆ ئەرەمەرزیا. جە سیستموو پەروەردەو ئێمەنە مەجلیس و کۆمۆنەکۍ بە بنەما هۊرگیریا و بە پاو ئاستوو پەروەردەیی گەلی گرفتەکۍ گلېرگەی وزیا ڕووە و تاوتوێ مکریا، هەوڵەکۍ بە پاو بەرنامەکاو ناوەڼو پەروەردەی ئاماڎۍ کریێنۍ، پەی بەرزکەردەیۆ ئاستوو ئەنەیاوای ژەنا، ۋێڕاوەبەردەی و کۊشیای پەی بەدەس ئاردەی مافەکا، گرڎ حەفتېوە پەروەردە بە شێوێوە سیستماتیک ملۆڕاوە.
هەنگامېوەتەرەی گرنگە پەرسوو پەروەردەو پیایان. پېسە کۆمیتەو پەروەردەیی کۆنگرە ستاری ئەرکوو پەروەردەو پیایایچما گېرتەن ئەستۆ و پیێچ جە پڕۆسەکەنە پەروەردە مکریا. کاتێ پیۍ بەشدارۍ دەورەکا پەروەردەی مبا، بەشدارۍ دلۍ گلېرگەیچ با، تەنانەت ئەگەر جە ئاستێوە بەرزیچەنە نەبۆ کۊشیای پەی یەکسانی جنسی کۆمەڵایەتی دروس مبۆ. پەی بنیاڎنیای پێوەرە ژیۋای ئازاڎی، جە پەروەردەکانە پەی پیایا نموونەو بنەیانەی دیموکراتیکی، کۊشیای جنسی ملۊڕاوە."
حەرپاسە گوڵستان گولۆ سەبارەت بە دەورو ژەنا جە بەرزکەردەیۆ ئاستوو پەروەردەی و بەقوەتکەردەی ۋێپارێزناینە واتش: "جە ڕاو سیستەموو پەروەردەیۆ جە گلېرگېوە دماکۊتۆ بەرەو گلېرگێوە ئەنەیاوای، ژەنی ئەنەیاوۍ، نەتەوەی دیمۆکراتیکی ملمۍ، گلېرگە جە گرڎ بوارەکانە ۋێش ڕاوەبەرمکەرۆ. واتە ژەنێوە کە ۋێش بشناسۆ، متاوۆ ۋێش پارێزنۆ و ۋەرا ۋەر بە هرووژمەکانە بە ئەرەکۊشای مردۆوە. پۊکەی بە پەروەردە و ئەنەیاوای ژەنۍ، ۋێپارێزنای پەرە مسانۆ. پۊکاتی ژەنی زانا و ئەنەیاوۍ بەردەوام بیێنۍ بە ئامانجوو دەوڵەتو تورکی و دەوڵەتا دوژمنوو ئەرەکۊشای ئازاڎیی ژەنۍ."
جە دمادمایی قسەکاشەنە گوڵستان گولۆ واتش: "گەرەکمانە سیستەمێوە سەرو بنەماو یەکسانی و دیموکراسی بنیاڎ بنیەیمۍ، گەرەکمانە پیێوە دیموکرات، ژەنێوە دیموکراتە، واتە گلېرگێوە یەکسان و دیمۆکراتیک بنیاڎ بنیەیمۍ. بێگومان پەی بنیاڎنیای ئی سیستەمەیە جە مژارو یەکسانی جێندەرینە جە شۆڕشوو ۋەرنیشتینە ئەرەکۊشایۍ گۊرە پەنەوازا."
حەرپاسە سەبارەت بە سەرمەشقایەتی ژەنا جە ۋێپارێزناینە واتش: "پېسە چنی دەورو ژەنۍ جە بنیاڎنیای گلېرگەینە گرنگی ۋێش هەنش، ۋەرپرسیاریەتی و ئەرکوو ژەنایچ چی سەردەمەنە زیاتەرا، شۆڕشوو ۋەرنیشتی پېسە شۆڕشوو ژەنا ئشناسیان پۊکەی ژەنی پېسە بەحرێوە بەرەو بوارەکا تەری ئینۍ جماینە. پېسە چنی ژەنی جە گلېرگەنە یانە ڕاوەبەر مکەرۆ، مشۊم بەهەمان شێوە جە ڕاوەبەردەی گلېرگەینە دەورش بۆ، بەشداریکەردەی ژەنا جە کار و ڕاوەبەردەی گلېرگەینە مبۆ بە مەڵامەتوو ئانەی گلېرگە جە سروشتوو ۋێش لانەڎۆ، پۊکەی پەنەوازا گلېرگە گرنگی بڎۆ بە دەور و سەرمەشقی ژەنا."
