چالاکی زینڎانیا سیاسی جە زینڎانەکا تورکیای و کوردسانینە پەی ئازاڎیی جەستەیی رابەروو گەلو کوردی عەبدوڵا ئۆجالانی، هۊرگێرتەی گۆشەگیری و چارەسەری سیاسی پرسوو کوردی بەردەواما.

زینڎانیا سیاسی جە ٤و نیسانوو ٢٠٢٤یوە بەشداری جە چەمپنەکەوتەی چنی بنەیانەکا مەکەرا و ئاماڎۍ ئەرەنیشتەکا دادگایچ مەبا و مافوو قسەکەردەی تەلەفونیچ بەکارنمارا. چالاکیەکە جە گرڎوو زینڎانەکانە جە کوردسان و تورکیانە بەردەواما.

زینڎانی سیاسی عەبدولستار ئۆزەر جە زینڎانوو مەرمەرەینە، سەبارەت بە چالاکیەکەیشا قسێش پەی ئاژانسوو هەواڵوو فوراتی (ANF)ی کەردۍ.

ئۆزەر باسش چانەی کەرد کە ئاستی سەرەتایی چالاکیەکەیشا مانگرتەی بۍ جە واردەی بە نۆبەتی کە بە ئامانجوو هوشیارکەردەیۆ ئەنجامدریا و ئاستی دووەموو چالاکیەکەیچ ئانەنە کە ئینسانە ئەنەیاواو دیموکراتیک و وڵاتپارێزنەکا خولقە بکەرا کە زیاتەر شانە بڎا ۋەروو ۋەرپرسیاریەکاشا.

ئۆزەر بەهاکاو گلێرگەی دیموکراتیکی و بیەی گەلوو کوردی پېسە مەڵامەتوو سیاسەتوو هجوومی جە ئیمراڵینە نیشانەدا و واتش، "ۋەروو ئانەی جە کەسایەتی رابەر ئاپۆینە جە ئیمراڵی  هجووم پەی سەروو بەهاکا گلێرگەی دیموکراتیکی و بیەو گەلو کوردی مکریۆ، ئەگەر جە ۋەرا ۋەروو ئانەینە تا ئیساتۍ هەڵوێسێوە گرڎین نیشانە نەدریابۆ، ئانە پەی ئێمە پېسە هێزەکا دیموکراتیکی وڵاتپارێزنی لاوازییا. ئێمە حۆڵ مڎەیمۍ بە رێبازوو چالاکی ئیساتێما ئانەی چارەسەر بکەرمۍ. ئێمە قەناعەتما چامنەن کە جە ئاستی یەرەمەنە ئێمە و گەلەکەما و هێزە دیموکراتیکەکا دروشمەو ' ئازاڎیی پەی رابەر ئاپۆی، چارەسەری دیموکراتیکی پەی پرسوو کوردی؛ بە سەرکەوتەی تاجدار مکەرمۍ.

ئۆزەر ئەرەیاۋناش، کە رێبازی تازەو چالاکیەکەیشا، ۋۍ گۆشەگیرکەردەی نییا، بەڵام ۋۍ یاوناین بە حەقەتینوو کۊشیای و گەشمەرڎا و رابەرایەتی و واتش: "ئێمە ئانەی پەی ۋێما بە شانس و دەرفەتێوە مۋینمۍ کە پېسە رابەر ئاپۆی بژیۋمۍ، جە رۆح، ئەندێشە و هەستەنە چنی ئاڎیی ئامێتۍ بیمۍ. ئانەی ئێمە مکەرمێش، قەراروو گێڵایۆین پەی جەوهەروو ۋێما، پەی بەها سیاسی و ئەخلاقیەکا. بێگومان پېسە گلێرگەی مشۆم خاوەنداری چانەی بکەرمۍ. گەلەکەما جە نەورۆزەنە و جە هۊرچنیەینە جوابێوە بەقوتش بە فاشیزموو دەوڵەتوو تورکیت داوە. ئانە هەڵوێسێوە گرنگ بۍ. هێزش بە گرڎیما بەخشا، هیوا و ۋێڕاگریش بەقوەت کەرد".