ئەندامی کوتلەی بەدر ئەمڕۆ ڕایگەیاند، داوایەکیان پێشکەشی وەزارەتی دەرەوە کردەوە سەبارەت بە دەستدرێژییەکانی دوڵەتی تورکیا بۆ سەر خاکی عێراق. راشیگەیاند، هێزە ئەمنیەکان ئامادەیی تەواویان هەیە بۆ ڕوبەڕوبونەوەی تورکیا و لێدان لە بارەگاکانیان.
عودەی شەعلان ئەندامی کوتلەی بەدر دەربارەی هێرشەکانی ئەمدواییەی دەوڵەتی تورکیا بۆ سەر خاکی عێراق و پێشێلکارییەکانیان، بۆ ڕاگەیاندنە عێراقیەکان قسەی کرد و وتی: "ئێمە ئەو هێرشانەی دەوڵەتی تورکیا شەرمەزار دەکەین و ئەوەی تورکیا دەیکات دەستدرێژییە بۆ سەروەریی خاکی عێراق، بۆ ئێمە وەک نوێنەری گەلی عێراق داوا لە حکومەتی عێراقی و وەزارەتی دەرەوە دەکەین هەمو ڕێوشوێنە یاساییەکان بگرێتە بەر".
شەعلان ئاماژەی بەوەشکرد، لە کاتی دوبارە بونەوەی ئەم پێشێلکارییانەدا ئێمە بە توندی وەڵامی تورکیا دەدەینەوە و وتیشی: "با هەموویان ئاگاداربن، هێزە ئەمنیەکانمان ئامادەن بۆ لێدان لە بارەگاکانی تورکیا لە ناو خاکی عێراق، هەروەها ئەو توانایەشمان هەیە بەرپەرچی هەموو هێرشێکی تورکیا بدەینەوە".
ژ.ت
