ئێشکگریی ئازادی لە پێناو ئازادیی عەبدوڵا ئۆجالان رێبەری گەلی کورد لە ٢٥ی حوزەیرانی ٢٠١٢ەوە لە شاری ستراسبۆرگی فەرەنسا دەستپێکردووە و ماوەى ٤٦٥ هەفتەیە بەردەوامە.

چالاکییەکە هەموو هەفتەیەک لەلایەن دەستەیەک لە کوردستانیان و دۆستەکانیان لە ئەوروپا بەڕێوەدەچێت و ئەم هەفتەیە چالاکییەکە لەلایەن دەستەیەک لە کوردستانیانی شاری دوسلدۆرفی ئەڵمانیاوە بەڕێوەدەچێت.

ئێشکگرانی ئەم هەفتەیە بریتین لە ئایڤاز ئەجە، بەدران ئایدەنیز و ئایڤاز ئاجار.

ئاێڤاز ئەجە بە ناوی دەستەکەوە راگەیاندراوێکی خوێندەوە و رایگەیاند، یادی شەهیدانی مانگی ئایار بەرز رادەگرن و لەسەر هێڵی شەهیدان درێژە بە تێکۆشانەکەیان دەدەن. ئایڤاز ئەجە سڵاوی لە بەرخودانی گەریلا لە دژی داگیرکەری و بەرخودانی زیندانیان لە دژی گۆشەگیری کرد.

ئایڤاز ئەجە راشیگەیاند، بێدەنگیی ئەوروپا بەرامبەر بە هێرشەکانی دەوڵەتی تورک ئیدانە دەکەن و وتی، ئەوروپا و مرۆڤایەتی قەرزداری کوردن، چونکە کورد بەڵای شەڕی جیهانیی چەتەکانی داعشی تێکشکاند.

ئایڤاز ئەجە ئەوەشی راگەیاند، گەلی کورد تێکۆشانی ئازادیی بۆ ئازادیی رێبەرەکەی خۆی سەردەخات و لەو پێناوەشدا لە هەموو گۆڕەپانەکاندا تێکۆشان گەورە دەکات.

ئایڤاز ئەجە وتی، "گۆشەگیریی سەر رێبەر ئاپۆ تاوانی دژ بە مرۆڤایەتییە" و داوای لە دەوڵەتە ئەوروپییەکان کرد، کە خۆیان بە داکۆکیکاری مافەکانی مرۆڤ و دیموکراسی دەزانن، دەست لە سیاسەتی جوت ستاندەردی (سیاسەتی بانێک و دوو هەوا) لە دژی گەلی کورد هەڵبگرن.

ئایڤاز ئەجە سەرنجی خستەسەر راگەیاندراوی نووسینگەى مافەکانی سەدە، کە چەند رۆژ لەوە پێش بڵاوکرایەوە و وتی، "سەپاندنی سزای دیسیپلین بەسەر رێبەرەکەماندا بە هیچ شێوەیەک لەلایەن گەلی کوردەوە قبوڵ ناکرێت" و داوای لە گەلی کورد کرد، لە هەموو گۆڕەپان و شوێنەکاندا بەرخودان گەورە بکەن.

ژ.ت