بەرخودێرانی چیا نامەیان بۆ ژنه‌زیندانییه‌كان نارد
بە بۆنەی ٨ ی ئادار، گەریلاکانی چیا نامەیان بۆ ژنه‌زیندانییه‌كان نارد و گوتیان: «ئێمە ئه‌و گۆشەگیرییه قبووڵ ناكه‌ین كه دەسەڵاتی فاشیستی ئەکەپە - مەهەپە ده‌یه‌وێت بیكاته بارودۆخێكی ئاسایی.»
ئه‌و ژنە بەرخودێرانه‌ی لە دژی هێرشەکانی دەوڵەتی تورک لە هەرێمەکانی پاراستنی مەدیا بەرخۆدان دەکەن، بەبۆنەی ٨ ی ئادار ڕۆژی جیهانیی ژنانی ڕه‌نجده‌ر نامەیان بۆ ئه‌و ژنانه نارد كه له زیندانه‌كانی ده‌وڵه‌تی توركدان. لە نامەکەدا هاتووە، ئه‌گه‌ر گەلێک لە بەرامبەر چەوساندنەوە، زۆرداری و هێرشه‌كانی لەناوبردن بەرخۆدان بكات و ژنان پێشەنگ بن، سەرکەوتن مسۆگەر دەبێت.
ده‌قی نامه‌كه:
بەرخۆدێرانی هێژا، چالاکانی بەڕێز و ژنه خۆڕاگره‌كانی زیندان،
سه‌ره‌تا بە هاتنه‌وه‌ی مانگی ئادار و پەرۆشیی بەهار، بە بای چیادا سڵاوتان لێ ده‌كه‌ین. ٨ی ئادار لە ئێوە پیرۆز دەکەین. بەهار ژیانەوەی سرووشتە، به‌هار چۆن سرووشت ده‌ژیه‌نێته‌وه، ئێوەش بە بەرخۆدانتان لە مانگرتن لە خواردن ئەو ژیانەی کە فاشیزم ده‌یه‌وێت تێكی بدات ده‌یژیه‌ننه‌وه.
لە سەرەتای مێژووەوە هەمیشه ژنان ژیانیان ئافراندووە و لە دژی تاریکیدا وەستاونەتەوە. سه‌ره‌ڕای هەموو زەخت و کۆمەڵکوژییه‌كانی عه‌قڵیه‌تی پیاوی سه‌رده‌ست، بەرخۆدان و تێکۆشانیان کردووە. ئەمڕۆ ئێمە ئه‌و گۆشەگیرییه قبووڵ ناكه‌ین كه دەسەڵاتی فاشیستی ئەکەپە - مەهەپە ده‌یه‌وێت بیكاته شتێكی ئاسایی. سه‌رله‌نوێ ژیان ده‌ئافرێنینه‌وه. خۆڕاگری سه‌ره‌كیترین تایبه‌تمه‌ندیی ژنه.
ئێمە شوێنکەوتووی سەما یوجەین
کچانی ئەو دایکانەی کە لە بەرامبەر ئازاری گه‌وره بەرخۆدانی گه‌وره‌یان کردووە، هاوڕێیانی سارا و سەماکان، هاوڕێبازانی لەیلا گیوڤه‌ن کە لە دژی تاریکی بەرەو خۆر ده‌ڕوات؛ ژنانی خۆڕاگر و سەربەرز، ئه‌و ژنانه‌ی کە تێدەکۆشن بۆ یەکسانی و ئازادی؛ بەبێ ئه‌وه‌ی ڕه‌چاوی جیاوازی شوێن و وه‌ڵاتان بکەن، ئێمە لە بەرخۆداندا بە گیانێکی هاوبەش دەژین.
ئەمڕۆ ئێمە هێشتا هه‌ست به‌و ١٢٩ ژنه ده‌كه‌ین کە لە ساڵی ١٨٥٧ خۆیان فیدا كرد و به به‌رخۆدانی ئه‌وان ٨ ی ئادار پیرۆز دەکەین. هەر یەکێك له ئێمه هه‌ست به‌و ١٢٩ ژنە ده‌كات و له‌گه‌ڵیدا ده‌ژی. هه‌ر یه‌كێك له ئێمه شوێنكه‌وتووی هاوڕێ کلارا زەتکینەکان، زیلانەکان، سارایه‌کان و بێریتانەکانین. هەریەک لە ئێمە دەبێتە کیبریه، مەنال، هاجەر، سەبیحە، ڕێحان، شادیه، ئایتەن، ئەڤین، ئازیمە، ڕۆناهی و ئەسما... هەریەک لە ئێمە به به‌رخۆدانی ئازادی له خۆڵه‌مێشی خۆمان ژیان دەئافرێنین. وەک هەڤاڵ سەما یوجە کە له خۆڵه‌مێشی خۆی، خۆی ئافراند. له به‌رامبه‌ر کۆیلایەتی، دواكه‌وتوویی و تاریکیی سیستەمی سەردەست، بە ئاگری ئازادی ژیانی ڕووناک کردووه‌ته‌وه و تاریکی لەناوبردووه. ڕووی كردووه‌ته ڕێبەرایه‌تی و خۆر؛ به‌ره‌و ئازادی ڕۆیشتووه. ئێوە هەڤاڵی سەما یوجەن.
ڕێكردنه‌كانی ئێمە هه‌میشه مێژوویان نووسیوه‌ته‌وه!
ڕێگه‌مان یەکە و ئێمە لەسەر هەما ڕێگەین. لاڕێگه‌كانمان جار جار بشگۆڕێن، ئامانج و ئه‌و شوێنه‌ی كه ئێمه‌ی ده‌گه‌یه‌نێتێ، هه‌مان شوێنه. ئێستاش ئێوه دژوارترین لاڕێگه‌تان هه‌ڵبژاردووه و به‌بێ ماندووبوون ڕێ ده‌كه‌ن. ڕێبوارانی ڕێگه هەمیشه هاریكاریان كردووین و هێزیان پێداوین. هەندێک جار بە تامی شیعر، هەندێک جار به تامی ڕۆمانه‌كانیش بووبێت، هه‌میشه مێژوویان نووسیوه‌ته‌وه.
ژنانی به‌رخۆدێر كه مێژوویان نووسی؛
هەر ژنێک كه لە دژی فاشیزم سەرکەوتووە، باڵاده‌ستیی پیاوی قبووڵ نه‌كردووه، نەوە دوای نەوە دەژی و جێده‌ستیان لای هەر ژنێک دەمێنێتەوە و بۆیان ده‌بێته هێز. تەواوی ژنانی به‌رخۆدێر لە هەر شوێنێک بن ده‌گه‌نه یه‌ك و سه‌رده‌كه‌ون.
ئه‌و ژنانه‌ی كه بە بەرخۆدان ئازاد دەبن و به ئازادی جوان دەبن؛ ئەو ژنانەی کە ئه‌وه‌نده ژیانیان خۆش دەوێت ئاماده‌ن له‌پێناویدا بمرن. ئێمە بەیەکەوە شكست به فاشیزم دێنین. بە بەرخۆدانی ژنانی جیهان ڕۆژی خۆش و گەش لە پێشمانن. ئەگەر ژن پێشەنگایەتی بۆ تێکۆشانی گەلێک بكات لە دژی چەوساندنەوە، زۆرداری و لەناوبردن، سەرکەوتن مسۆگەره.
ده‌بێ فاشیزم لەو ژنانە بترسێت کە بەرەو سەرکەوتن، ئازادی و به‌رخۆدان ده‌چن
فاشیزم کە لە بەرخۆدانی ژن دەترسێت، بە زەخت و زۆرداری، بە کۆمەڵکوژی و هەموو جۆرێك کۆیلایەتی بەسەر ژندا ده‌سه‌پێنێت، ده‌یه‌وێت ئەم سیستەمەی خۆی مسۆگه‌ر بکات. بەڵام ئەوان ناتوان سەرکەوتوو بن.
ده‌بێ فاشیزم لەو ژنانە بترسێت کە ئازادییان کردووەته ئامانج. ده‌بێ عه‌قڵیه‌تی پیاوی سەردەست بترسێت. دەبێ ئەو کەسانە بترسن کە خاوەنی عه‌قڵیه‌تی کۆیله‌دارین. چونکە ئێمه‌ی ژنان بە چالاکییەکانی مانگرتن لە خواردن جه‌سته‌ی خۆمان ده‌كه‌ینه بۆمب، ده‌یكه‌ینه تۆپی ئاگر و پارچه پارچه به هه‌موو شوێنێكدا بڵاوده‌بینه‌وه.
ژنانی بەرخودێر کە جگە لە ئازادی و سەرکەوتن هیچ شتێکی دیكه پەسەند ناکەن، به دڵسۆزییمان بۆ ئازادی و باوەڕیمان بە سەرکەوتن سڵاوتان لێ دەکەین. جەژنی ٨ی ئادار له ئێوه پیرۆز ده‌كه‌ین و دەڵێین کە به‌دڵنیاییه‌وه سەرده‌كه‌وین.
بەرخودێرانی چیا
s.m
