کۆنگرە ستار بانگەوازی لە هەموو ئازادیخوازان کرد، لە ١٠هەمین ساڵوەگەڕی کۆمەڵکوژی شەنگالدا بڕژێنە گۆرەپانەکان و چالاکی ئەنجام بدەن و وتی: "دەنگی ژنانی شەنگال دەنگی هەموو ژنانی تێکۆشەرە."
ئەنجومەنی کۆنگرە ستار بە بۆنەی ١٠ هەمین ساڵوەگەڕی کۆمەڵکوژی ٣ی ئابی ٢٠١٤ی سەر کۆمەڵگەی ئێزیدی کە لەلایەن چەتەکانی داعشەوە لە شەنگال ئەنجامدرا، ڕاگەیاندراوێکی بڵاوکردەوە و بانگەوازی بۆ ئەنجامدانی چالاکی بەرفراوانکرد.
لە سەرەتای ڕاگەیاندراوەکەدا یادی قوربانیانی کۆمەڵکوژیەکە دەکاتەوە و هاتووە: "شەڕڤان و میلیتانان کە بەرخۆدانی مێژوویان بەرامبەر چەتەکانی داعش لە شەنگال بەڕێوەبرد یاد دەکەینەوە و بەڵێنی پێکهێنانی خەونی شەهیدان دەدەین."
لە بەشێکی دیکەی ڕاگەیاندراوەکەدا ئاماژە بە داگیرکارییەکانی دەوڵەتی تورک و کارە قێزەونەکانی پەدەکە دەکات لە دژی کۆمەڵگەی ئێزیدی و هاتووە: "دەوڵەتی تورک هەموو جۆرە ڕێبازێکی شەڕ بەکاردێنێت و هەوڵەدات گەلی شەنگالمان لە ناوبەرێت. پەدەکە هەموو ڕۆژێک درۆ و پاگەندەی ناوزڕاندی ئێزیدییەکان دەکات و هەڕەشە دەکات، بەدەستی پەدەکە داگیرکاری سەر باشووی کوردستان بەرفراوانتربووە، ئەمەش کاریگەری لە سەر ژیانی ژنان دەکات، ڕێگە لەبەر کۆچبەری و قڕکردن دەکاتەوە.
ئەو ڕاستیەیی هێشتا کوشتنی ژنان وەک تاوان لە دژی مرۆڤایەتی نابینرێت، دەبێتە هۆکاری ئەوەی کە دەوڵەت و دیکتاتۆرەکان کە بە سیاسەتەکانی قڕکردنی ژنانەوە هەوڵی مانەوەی خۆیان دەدەن، لە دادگایکردنی ئەم تاوان و شەڕانەیان نەترسن."
هەر لە ڕاگەیاندراوەکەدا کۆنگرە ستار ئاماژە بەوەدەکات لە بەرامبەر هەموو جۆرە توندی، داگیرکاری و قڕکردنێک بێدەنگ نامێننەوە و پشتگیری دەدات بە ژنانی ئێزیدی و دەڵێت: "دەنگی ژنانی ئێزیدی دەنگی هەموومانە، وەک ژنانی شۆڕشگێڕ پشتگیری لە ژنانی شەنگال، ئەڤغانستان، ڕۆژهەڵات و هەموو ژنانی تێکۆشانی ئازادی دەکەین."
لە کۆتایی ڕاگەیاندراوەکەدا بانگەوازی ئەنجامدانی چالاکی دەکات و دەڵێت: "بانگەوازی لە هەموو ژنانی ئازدیخواز، ڕۆشنبیر، هونەرمەند، تێکۆشەر دەکەین، پێکەوە تێکۆشانی ئازادیمان بەرفراوان بکەین و بڕژێینە گۆڕەپانەکان."
