موقتەدا سەدر، ڕێبەری گەورەی ڕەوتی شیعە(سەرۆکی رەوتی سەدر) لە عێراق ڕایگەیاند، ئیسرائیل بە پێشێل کردنی یاسا نێونەتەوەییەکان بە زۆرەملێ فەلەستینییەکانی ئاوارە کردووە و ئەو کارانەش "پێچەوانەی هەموو بەها ئایینی و مرۆییەکانە."

موقتەدا سەدر بە ڕەخنەگرتن لە هەڵوێستی ئەمەریکا بەرامبەر بەم دۆخە ڕایگەیاند: "ئەمریکا یاسا و ڕێسا نێونەتەوەییەکان پێشێل دەکات، بەو شێوەیە بە ئاشکرا پشتیوانی سیاسەتە پێشێلکارییەکانی ئیسرائیل دەکات دژ بە گەلی فەلەستین."

موقتەدا سەدر ئاماژەی بەوەشدا کە پاڵپشتی ئەمریکا لە ئیسرائیل بووەتە هۆی نائارامی و پێکدادانەکانی ناوچەکە و وتی: "ئەمریکا پشتیوانی لە تیرۆری ئیسرائیل دەکات لەدژی گەلی فەلەستین، لوبنان و شوێنەکانی دیکەی ناوچەکە."

هەروەها موقتەدا سەدر داوای لە کۆمکاری عەرەبی و ڕێکخراوی هاوکاریی ئیسلامی کرد هەڵوێستێکی یەکلاکەرەوە بگرنەبەر و داوای پچڕانی تەواوەتی پەیوەندییەکانیانی لەگەڵ ئیسرائیل کرد.

هاوکات موقتەدا سەدر ئاماژەی بەوەشدا کە پێویستە دەستوەردانەکانی ئەمریکا لە وڵاتە ئیسلامیەکان و جیهانی عەرەب کۆتایی پێبهێندرێت و پچڕانی پەیوەندییە ئابووری و دیپلۆماسیەکانی بە پێویست زانی.

موقتەدا سەدر داواشی لە حکومەتی عێراق کرد و ڕایگەیاند، پێویستە پەرلەمان بڕیارێکی بەدوور لە توندوتیژی بۆ کەمکردنەوەی بوونی دیپلۆماسی ئەمریکا لە عێراقدا بگرێتەبەر.