بەپێی هەواڵێکی ئاژانسی بی بی سی فارسی، عەباس ئوستانکەزی لە ئەندامە باڵاکانی گروپی تاڵیبان کە لە قەتەر دادەنیشێت، ڕایگەیاندووە، تاڵیبان دەوڵەتێکی نوێ ڕادەگەیەنێت.

ئوستانکەزی بەو ئاژانسەی وتووە: لە دوو ڕۆژی داهاتوو گروپی تاڵیبان، دەوڵتێکی نوێ لە ئەفغانستان ڕادەگەیەنێت کە دەوڵەتێکی گشتگیر دەبێت.

لەسەر ڕۆڵی ژنان لە دەوڵەتی داهاتووی تاڵیبان، ئوستانکەزی وتوویەتی: ژنان ڕۆڵیان دەبێت بەڵام نە لە ئاستە باڵاکاندا، بەو مەرجەی لەگەڵ دەوڵەتی پێشوو کە ئەمریکا پشتیوانیی کردووە هاوکارییان نەکردبێت.

ئوستانکەزی هەروەها لەسەر فڕۆکەخانەی کابولیش کە لەلایەن هێزەکانی ئەمریکاوە چوڵکراوە، وتوویەتی: فڕۆکەخانەکە لە دوو ڕۆژی داهاتوو دەکرێتەوە.

ئەمە لە کاتێکدایە کە تاڵیبان تا ئێستا بە کردەوە، خۆی لەوە دوور گرتووە کە کەسانی دیکە و بیروڕای جیاواز بەشداریی دەوڵەتی داهاتووی ئەفغانستان بن، هەروەها بە یاسا دژە ژنەکانیان، داوایان لە ژنان کردووە کە نەگەڕێنەوە سەر کارەکانیان.

ف.ق