مەجلیسی بنەماڵەی شەهیدانی شاری حەلەب ڕێپێوانێکی بۆ ئازادی جەستەیی ڕێبەری گەلی کورد عەبدوڵا ئۆجالان ڕێکخست. سەدان کەس لە دانیشتووانی شاری حەلەب و نوێنەری ڕێکخراوە مەدەنییەکان و لایەنە سیاسییەکان بەشداری ڕێپێوانەکەیان کرد. لە میانی ڕێپێوانەکەدا ئاڵای ڕێبەری گەلی کورد عەبدوڵا ئۆجالان و دروشمی "بژی سەرۆک ئاپۆ" و "بێ سەرۆک ژیان نابێ" بەبێ وەستان بەرزکرانەوە.

ڕێپێوانەکە لە بەردەم هۆڵی کۆبوونەوەکانی بەشی ڕۆژئاوای گەڕەکی شێخ مەقسود دەستی پێکرد. ڕێپێوانەکە لە بەردەم ناوەندی شەهید گەلهات لە بەشی ڕۆژهەڵاتی گەڕەکەکە وەستا و خولەکێک ڕێزگرتن بەڕێوەچوو. ئەندامی مەجلیسی گشتی پەیەدە، ڤالەنتینا عەبدۆ گوتی: "سەرکردە ڕامانێکی بەخشییە گەلانی ئازادیخواز و تا ئێستاش لە زیندان بەرخۆدان دەکات، هەر بۆیە ڕژێمی تورک گۆشەگیری لەسەری توند دەکات و پەیوەندییەکانی لەگەڵ دەرەوە دەپچڕێنێت".

هەروەها گوتی: " با دەوڵەتی تورک باش بزانێت کە ڕێبەرێتی تەنیا نییە، بەڵکو ملیۆنان کەس شوێنکەوتووی ئەون و ڕامانەکانی جێبەجێ دەکەن. دیواری ئیمراڵی ڕێبەرێتی لە گەل دانابڕێت. ئێمە بە پێداگری و بەرخۆدان گۆشەگیری لەسەر ڕێبەرێتی خۆمان دەشکێنین. ڕێبەرێتی بە پرۆژەی نەتەوەی دیموکراتیک دژ بە سیستەمی سەرمایەداری و زیهنیەتی دەسەڵاتدار وەستاوەتەوە".

ڕاگەیاندراوەکە بە دروشمی "بژی سەرۆک ئاپۆ" و "بێ سەرۆک ژیان نابێ" کۆتایی هات.