ئەمڕۆ مەجلیسی مەدەنی دەیرەزۆر، خۆپیشاندانێکی ڕێکخست بۆ شەرمەزارکردنی نامە هەڕەشەئامێزەکانی داگیرکەری تورک بۆ ڕێبەری گەلی کورد عەبدوڵا ئۆجالان، تێیدا هاوڵاتییان و ئەندامی پارتەکان و دامەزراوە مەدەنی و سەربازییەکان بەشداربوون.

خۆپیشاندانەکە لەبەردەم مەجلیسی مەدەنی دەیرەزۆر لە ناوچەی ٧ کیلۆ دەستیپێکرد، خۆپیشاندەران وێنەی ڕێبەری گەلی کورد عەبدوڵا ئۆجالانیان بەرزکردەوە و بە شەقامەکاندا گەڕان، لەگەڵ گوتنەوەی درووشمی "بێ سەرۆک ژیان نابێ" و "بڕوخێ دەوڵەتی داگیرکەری تورک" و "بڕوخێ پیلانگێڕیی نێودەوڵەتی"، تا گەیشتنە چوارڕیانی مەعامل.

پاشان خۆپیشاندانەکە گۆڕا بۆ گردبوونەوەی ناڕەزایی، پاش خولەکێک وەستان بۆ گیانی شەهیدان، جێگری هاوسەرۆکی مەجلیسی دەیرەزۆر، فەتحی عەتیش گوتی: "ئەمڕۆ گردبوونەوەی ناڕەزایەتی ئەنجام دەدەین دژی سیاسەتی سیستەماتیکی دەوڵەتی تورک دژی ڕێبەر و بیرمەندی نێونەتەوەیی عەبدوڵا ئۆجالان".

هەروەها بانگەوازی کرد "هەموو دەوڵەتانی جیهان، دژی ئەم دەوڵەتە فاشیستە بوەستنەوە و گۆشەگیری سەر ڕێبەر عەبدوڵا ئۆجالان بشکێنن، توندترین سزا بسەپێنن بەسەر دەوڵەتی فاشیستی تورک. پێویستە هەموو مافپەروەران و پێکهاتەکان و ئەنجوومەنی ئاسایش، دژی دوڵەتی تورک بوەستنەوە، لێپێچینەوەی لەگەڵدا بکەن پەیوەست بە پێشێلکارییەکان دژی ڕێبەری مەزنمان عەبدوڵا ئۆجالان".