هێرشێک لە تربەسپی، ٣ شەهید و ٢ بریندار
بەگوێرەی ڕاگەیاندراوێکی هێزەکانی ئاسایشی ناوخۆ، فڕۆکەی بێ فڕۆکەوانی تورک دوو ئۆتۆمبیلی لەسەر ڕێگەی شارۆچکەی تەل مەعروف کردۆتە ئامانج، بەهۆیەوە ٣ شەهید و ٢ بریندار هەن.
پاش نیوەڕۆی ئەمڕۆ، فڕۆکەی بێ فڕۆکەوانی داگیرکەری تورک لەسەر ڕێگەی نێوان گوندی خەزنە و شارۆچکەی تەل مەعروف لە باشوری گوندەواری تربەسپی دوو ئۆتۆمبیلی کردە ئامانج.
ناوەندی ڕاگەیاندنی هێزەکانی ئاسایشی ناوخۆ، ڕاگەیاندراوێکی بڵاوکردەوە، شەهیدبوونی ٣ کەس و برینداربوونی ٢ کەسی تری ڕاگەیاند.
لە دەقی ڕاگەیاندراوەکەدا هاتووە:
"لە درێژەی پێشێلکارییەکانی داگیرکەری تورک بۆ سەر هەرێمەکانمان، ئەمڕۆ، پێنجشەممە ٢٧ ی تەمموز، فڕۆکەی بێ فڕۆکەوانی داگیرکەری تورک لەسەر ڕێگەی نێوان گوندی خەزنە و شارۆچکەی تەل مەعروف، دوو ئۆتۆمبیلیان کردە ئامانج، بەهۆیەوە ٣ هاوڵاتی شەهیدبوون و ٢ هاوڵاتی برینداتربوون.
دواتر هەموو زانیارییەکان بڵاودەکرێنەوە".
