هێرشی بەرفراوانی زەمینی چەتەکانی دەوڵەتی تورکی داگیرکەر، کە شەوی ڕابردوو بۆسەر گوندەکانی باکووری ڕۆژئاوای منبج ئەنجامیان دا، تێکشکێندرا. لە لایەکی دیکەوە گوندەکانی باکور و ڕۆژئاوای تل تەمر بۆردومان دەکرێن.
بەگوێرەی سەرچاوە خۆجێیەکان، شەوی ڕابردوو چەتەکانی دەوڵەتی تورکی داگیرکەر هێرشێکی زەمینی بەرفراوانیان بۆ سەر گوندەکانی عەرەب حەسەن، موحسنلی، توخار، ئوم عەدەسە و ئوم جلوود کە دەکەونە باکووری ڕۆژئاوای منبج ئەنجامداوە.
ھەر بە گوێرەی زانیارییەکان، شەڕڤانانی ئەنجوومەنی سەربازی منبج دەستبەجێ بەرپەرچی هێرشەکانیان داوتەوە و شەڕەکە تا بەرەبەیان بەردەوام بووە.
لە ئەنجامی شەڕەکەدا ژمارەیەکی زۆر چەتە کوژران، ھەروەھا دەست بەسەر ژمارەیەکی زۆریش چەک و تەقەمەنیدا گیراوە و هێرشی چەتەکان تێکشکێندراوە.
لە لایەکەی دیکەوە لە دوێنێوە گوندەکانی باکور و ڕۆژئاوای تل تەمر بە چڕی بۆردومان دەکرێن.
بەپێی زانیارییەکان، گوندەکانی تەویلە، تل تەویل، ئاشورییە، تل جومعە، ئوم خەیر، تل گربەیت و گۆزەلیە لە ڕۆژئاوای شارەکە و گوندی دردارە لە باکووری شارەکە بە چەکی قورس و هاوەن بۆردومان دەکرێن.
ژ.ن
