سەدان کەس لە شاری حەسەکە و دەوروبەری بەشداربوون لە مەراسیمی بەخاکسپاردنی شەڕڤانی یەپەژە، شیرین عەلی (ئادار جودی). لە ٢٧ ی تەمموز لە شاری حەسەکە لەکاتی ئەرکەکەیدا تووشی ڕووداوێک هات، سەرەڕای هەوڵی پزیشکان، بەڵام لە ٣١ ی تەمموز شەهید بوو.  

ئامادەبووان لەبەردەم بارەگای مەجلیسی بنەماڵەی شەهیدان لە شاری حەسەکە تەرمەکەیان وەرگرت و بە کاروانێکی مەزن ڕوویانکردە گۆڕستانی شەهید دژوار لە گوندی داودیە.

مەراسیمەکە بە خولەکێک وەستان بۆ گیانی شەهیدان دەستی پێ کرد، پاشان ڕۆژدا ئەحمەد بەناوی مەجلیسی بنەماڵەی شەهیدانەوە، گوتی: "شەهیدان لە بەرەنگاربوونەوەی دوژمنی ستەمکاردا سەرکەوتن لەپێناو پاراستنی خاکی نیشتیمان".

ڕۆژدا دووپاتی کردەوە، لەسەر ڕێگەی شەهیدان بەردەوام دەبن تا شکاندنی هەموو هێرش و دوژمنکارییەکان بۆ سەر خاکی باکور و ڕۆژهەڵاتی سوریا و بەدیهێنانی سەرکەوتن.

لای خۆیەوە فەرماندە لە مەجلیسی سەربازی کانتۆنی حەسەکە، ڤیان وڵات، گوتی: "سەرەخۆشی لە خۆمان و بنەماڵەی شەهیدان شۆڕش سەرهەڵدان و ئادار جودی دەکەین، کە لەپێناو پاراستنی دەسکەوتەکانی شۆڕش دژی دوژمنکارییەکانی دەوڵەتی تورکی ستەمکار لە چیاکانی کوردستان و باکور و ڕۆژهەڵاتی سوریا شەهید بوون".

ڤیان بەڵێنی بۆ دایکی شەهیدان و ڕێبەری گەلی کورد عەبدوڵا ئۆجالان دووپات کردەوە، لەسەر ڕێگەی شەهیدان بەردەوام دەبن تا بەدیهاتنی سەرکەوتن و گەڕاندنەوەی هەموو خاکە داگیرکراوەکان.

لە مەراسیمەکەدا، مەجلیسی بنەماڵەی شەهیدانی شاری حەسەکە، ناسنامەی گەریلای هەپەگە، ساڵەح عەواد (شۆڕش سەرهەڵدان)ـی ئاشکرا کرد کە ١٩ ی تەمووز لە مەتینا شەهید بوو.

پاشان ئەندامی مەجلیسی بنەماڵەی شەهیدان، گوڵچین ئەحمەد، ناسنامەی هەردوو شەهیدی خوێندەوە و ڕادەستی بنەماڵەکەیانی کرد.

لەنێو هەلهەلەی دایکاندا، تەرمی شەهید ئادار جودی لە گۆڕستانی شەهید دژوار بەخاکسپێردرا.