ئۆپراسیۆنی ئەمنی بەردەوام کە دوێنێ لەلایەن یەپەژە و قەسەدە و هێزەکانی ئاسایشی ناوخۆ لە کەمپی هۆل و دەورەبەری دەستیپێکرد، لە دووەم رۆژدا بەردەوامە.

بەگوێرەی هەواڵێکی ئاژانسی هاوار نیوز هێزەکانی ئۆپراسیۆن دوای ئەوەی چەندین گوندیان پاککردەوە و گەیشتنە سنووری عێراق (باشوور)، ئێستا قورساییان خستووەتە سەر هێڵی نێوان شارۆچکەکانی هۆل و شەداد و بەردەوامن لە گەڕان.

بەپێی زانیارییەکان تائێستا چەتەیەک کوژراوە و ٤٠ چەتەی سەر بە شانەکانی داعش دەستگیرکراون و دەستیش بەسەر بڕێکی زۆر چەک و تەقەمەنیدا گیراوە.

ئامانجی ئۆپراسیۆنەکە پاککردنەوەی ١٠٠ کیلۆمەترە لە سێگۆشەی کەمپی هۆل و دەوروبەری (ناوچەکانی نێوان هۆل، تل حەمیس، حەسەکە، عەشیرە و شەداد).

هێزەکانی ئۆپراسیۆنی ئەمنی بەردەوام لە راگەیەندراوێکدا باسیان لەوەکردووە، "ئۆپراسیۆنی پاککردنەوەی دەوروبەری هۆل، رووبەرێکی فراوانی گوندەکانی باشوری ئەو ناوچەیە و هەروەها سنووری سوریا-عێراقیش دەگرێتەوە، بەدەیان ئەشکەوت و شوێنی خۆحەشاردانی تیرۆریستانی داعش پاککراونەتەوە".