پەیەدە: بەم هێرشانە ئیرادەمان ناشکێنن
پارتی یەکێتیی دیموکراتیک (پەیەدە) بەبۆنەی دوایین هێرشی داگیرکەری تورک بۆ سەر کۆبانێ، ڕاگەیاندراوێکی بۆ ڕای گشتی بڵاوکردەوە.
پارتی یەکێتیی دیموکراتیک (پەیەدە) بەبۆنەی دوایین هێرشی داگیرکەری تورک بۆ سەر کۆبانێ، ڕاگەیاندراوێکی بۆ ڕای گشتی بڵاوکردەوە.
فڕۆکەیەکی بێفڕۆکەوانی داگیرکەری تورک لە کاتژمێر ١١:٥٥ ئەمڕۆ، ماتۆڕسکیلێکی کردە ئامانج لەسەر ڕێگەی حەلەب لە دەروازەی باشوری شاری کۆبانێ. بەهۆیەوە ٣ هاوڵاتی برینداربوون بە ناوەکانی: محمد بەهجەت ئەیوب (٢٥ ساڵ)، خەبات ئەدهەم (٢٨ ساڵ)، عەلا عەبدولڕەزاق (٢٢ ساڵ).
لە وەڵامی ئەمەدا، پەیەدە ڕاگەیاندراوێکی بڵاوکردەوە بە ئامادەبوونی بەشێک لە ئەندام و بەڕێوەبەرانی پارتەکە. ڕاگەیاندراوەکە لەلایەن ئەندامی مەجلیسی گشتی پارتەکە، ئەحمەد خۆجە خوێنرایەوە، تێیدا هاتووە: "ساڵانێکە دەوڵەتی داگیرکەری تورک هێرش دەکاتە سەر ڕۆژئاوا و بەتایبەت کۆبانێ کە چەتەکانی داعشی هاوکاری دەوڵەتی داگیرکەری تێکشکاند، دووبارە دەوڵەتی داگیرکەری تورک بە سەرۆکایەتی ئەردۆگان و پاش دووبارە وەرگرتنەوەی سەرۆکایەتی تورکیا هێرش دەکاتەوە".
ئەحمەد خۆجە ئاماژەی کرد بە هێرشەکانی سەر کانتۆنی شەهبا و سلێمانی و کۆبانێ و گوتی، ئامانج لەم هێرشانە ترساندن و ئاوارەکردنی خەڵکە بۆ جێبەجێکردنی پیلانی گۆڕینی دیمۆگرافی، بەڵام گەلی کۆبانێ باوەڕی هەیە بە بەرخۆدانەکەی، دەوڵەتی تورک هەرچییەک بکات و هێرش بکات، گەل ناچەمێت.
خۆجە لە کۆتایی ڕاگەیاندراوەکەدا گوتی: "ئێمە وەک گەلی کۆبانێ تا کۆتایی بەرخۆدان دەکەین لەسەر خاکی خۆمان، هەرچەن هێرش و هەڕەشە و کۆمەڵکوژییەکانی سەرمان زیاتر بێت".