ئەمڕۆ هاوکاتە لەگەڵ یەکەمین ساڵیادی شەهیدبوونی فەرماندەکانی یەپەژە (ژیان تۆڵهەڵدان، ڕۆژ خاپور، بارین بۆتان)، پاش بەئامانجگرتنی ئۆتۆمبیلەکەیان لەلایەن فڕۆکەی بێ‌فڕۆکەوانی تورکەوە لەسەر ڕێگەی قامیشلۆ_تربەسپی.

بەم بۆنەیەوە، بە ئامادەبوونی بنەماڵەی شەهید ژیان و ئەندامانی مەجلیسی بنەماڵەی شەهیدان و شەڕڤانانی یەپەگە و یەپەژە لە شاری حەلەب، مۆم لەسەر گۆڕی شەهید ژیان و شەهیدانی گۆڕستانی بەرخۆدانی گەڕەکەکانی شێخ مەقسود و ئەشرەفیە داگیرسێنرا.

پاش خولەکێک وەستان بە بێدەنگی، دایکی شەهید ژیان تۆڵهەڵدان، ئاسیا حەمۆ قسەی کرد و سڵاوی نارد بۆ ڕێبەری گەلی کورد عەبدوڵا ئۆجالان لە زیندانی ئیمراڵی.

ئاسیا متمانەی خۆی دووپاتکردەوە بەوەی هاوڕێیانی شەهید ژیان تۆڵەی شەهید ژیان و هاوڕێ شەهیدەکانی دەکەنەوە.

پاشان مۆم لەسەر گۆڕەکان داگیرسا و هەلهەلەی دایکان بەرزبووییەوە.