کۆنگرەی ستار لە هەرێمی فورات بە بۆنەی ٢٧ەمین ساڵیادی شەهیدبوونی زەینەب کناجی (زیلان) کۆبوونەوەیەک سازکرد.

بە سەدان ژن و هاوڵاتیانی هەرێمی فرات بەشدارییان لە کۆبوونەوەکەدا کرد. کۆبوونەوەکە لە ناوەندی کولتور و هونەری باقی دخۆ سازکرا. کۆبوونەوە بە خولەکێک رێگرتن دەستیپێکرد. دواتر ئەندامی کۆنگرەی ستار رودەم ئەحمەد قسەی کرد و وتی: "زیلان بە خۆشەویتی ئازادی و سوێندی بونیاتنانی کۆمەڵگای کورد گیانی خۆی بەخت کرد. زیلان بەم جۆرەی وت، ' ئەگەر لە گیانم زیاتر شتێکی دیکەم هەبوایە، من دەمکرد بە قوربانی خاکی کوردستان'. دوژمن دەیگوت، 'ئێمە کۆنکرێتمان کرد سەر کورد و ئیتر لەناومان برد'. زیلان ئەوەی پێچەوانە کردەوە و رێگای بەرخودانی گرتەبەر. ئێمە تاسەر شوێنکەوتووی هێڵی زیلان دەبین و تا کۆتایی بەدوای ئەودا دەچین، تا بونیادنانی کۆمەڵگایەکی ئەخلاقی و سیاسی".

دواتر ناسنامەی شەهید زیلان خوێندرایەوە و پاشان بەڵگەفیلمێک پێشکەشکرا. لە بەڵگەفیلمەکەدا باس لە بەرخودان و تێکۆشانی ژنی کورد لە مێژوودا کرا.

کۆبوونەوەکە بە وتنەوەی دروشمی "شەهید نامرن" و "ژن، ژیان، ئازادی" کۆتایی هات.

هـ . ب