لە راگەیەندراوێکی هێزەکانی رزگاری عەفریندا هاتووە، شەڕڤانێکیان بە ناوی بروسک مەیدانا (خالید شێخ دادا) لە عەفرین شەهید بووە.

لە راگەیەندراوەکەدا باس لەوەکراوە، "یادی هاوڕێمان بروسک مەیدانا بە بەرزی رادەگرین کە ٢٣ ی تەمووزی ٢٠٢٤ لە هەرێمی عەفرین تێکەڵ بە کاروانی شەهیدان بوو".

ئەوەش خراوەتەڕوو کە بروسک مەیدانا لە چەندین قۆناغی ئەستەم و دژواری شۆڕشدا بەشداربووە، هەر لە رزگارکردنی شەهبا تا شەڕ لە دژی داعش لە ساڵی ٢٠١٦ و هەروەها بەرخودانی سەردەم لە عەفرین و بە سەرکەوتوویی سەرجەم ئەرکەکانی راپەڕاندووە و لە هەموو ژیانی شۆڕشگێڕیی خۆیدا هاوڕێیەتیەکی باش و دروستی پەیڕەو کردووە و بە دڵپاکی، لەخۆبوردەیی و خاکەڕایی هەم یارمەتیدەری هەڤاڵانی بووە و هەمیش جێگەی خۆشەویستی بووە.

ئاماژەی بەوەش کراوە، "هاوڕێ بروسک بە ژیان و تێکۆشانی خۆی میراتێکی بەجێهێشتووە، بەڵێن دەدەین کە شایەنی هاوڕێیەتی ئەو بین و شێوازی تێکۆشانی ئەو بکەینە بناغەی ئازادیمان. خاوەنداری و بەزیندوویی راگرتنی میراتی شەهیدان تەنیا بە سەرکەوتن مسۆگەر دەبێت. لەپێناو هێنانەدی ئاوات و ئامنجەکانیان تێکۆشانێکی دژوار و بێ وچان دەگرینەبەر. لەسەر ئەو بنەمایانە، سەرەخۆشی لە هەموو گەلە وڵاتپارێزەکەمان و بەتایبەتی بنەماڵەی بەنرخی هاوڕێمان بروسک دەکەین".

زانیاری لەبارەی ناسنامەی هاوڕێ شەهیدەکەمان بەم جۆرەیە:

ناسناو: بروسک مەیدانا

ناو و پاشناو: خالید شێخ دادا

ناوی دایک: ئەمینە

ناوی باوک: محەمەد

شوێن و کاتی شەهیدبوون: هەرێمی عەفرین/ ٢٣ی تەمووزی ٢٠٢٤

هـ. ب