فەرماندەیی گشتی یەپەگە، لە نۆهەمین ساڵیادی فەرمانی شەنگال، ڕاگەیاندراوێکی بڵاوکردەوە.

لە سەرەتای ڕاگەیاندراوەکەدا، تەواوی ئەو گەلەی بەشێوەیەکی دڕندانە کوژران، بەتایبەت ژنان، بە ڕێزەوە یادکرانەوە، هەموو ئەو کەس و هێزانەی پلانی ئەم کۆمەڵکوژییەیان داڕشت، شەرمەزارکران.

لە درێژەی ڕاگەیاندراوەکەدا هاتووە، کۆمەڵکوژی سەر ئێزدییەکان کۆمەڵکوژییەکی سەختە لە مێژووی مرۆڤایەتیدا، دەڵێت: "پێش هەموویان ئەو هێزانەی ئەوکاتە بەرپرسی هەرێمی شەنگال بوون، هەروەها تەواوی دەوڵەتانی هەرێمی و نێونەتەوەیی خۆیان کوێر و کەڕ کرد بەرامبەر ئەم کۆمەڵکوژییە. ئەم کۆمەڵکوژییە نەوەک هەر بۆ هەرێمەکە، بەڵکو بۆ تەواوی مرۆڤایەتی شەرمەزارییەکی مەزنە. تاوەکو گەلی ئێزدیمان دووبارە ڕووبەڕووی کۆمەڵکوژی نەبێتەوە، مرۆڤایەتی و هەموو هێزە جیهانییەکان پێویستە لەگەڵ ئەم گەلەدا بن و پشتیوانی تێکۆشانی ئازادییەکەیان بکەن لەپێناو هەبوونی خۆیان".

هەروەها تێیدا ئاماژەکراوە بە گەریلاکانی ئازادی کوردستان و یەپەگە و یەپەژە، کەوا بە بەرخۆدانی کچ و کوڕانی شەنگال لەپاڵ گەریلا و شەڕڤانانی یەپەگە و یەپەژە، ڕێگە لەم "کۆمەڵکوژییە ترسناکە" گیرا.

هەروەها لە ڕاگەیاندراوەکەدا هاتووە، دەوڵەتی تورک دەیەوێت قڕکردنی ئێزدییەکان تەواوبکات کە داعش بە نیوەناچڵی جێی هێشتبوو. لەبەرامبەر هێرشی دەوڵەتی تورک لە دژی گەل و هێزی پاراستنی شەنگال، بانگەواز لە هەموو دەوڵەت و هێزە نێونەتەوەییەکان دەکەن ڕۆڵ بگێڕن و دەوڵەتی تورکی هاوکاری داعش ڕابگرن و لێپرسینەوەی لەگەڵ بکەن.

لە کۆتایی ڕاگەیاندراوەکەدا، بەڵێن دووپات دەکەنەوە، بۆ دووبارە خاوەندارێتیکردن لە شەنگال و هاتووە: "ئێمە ئەمڕۆ و هەردەم وەک دوێنێ بە هەموو هێزمانەوە لەگەڵ گەلی ئێزدیمان دەبین. ئەگەر هێرشی نوێ بکرێتە سەر گەلی ئێزدیمان، ئێمە وەک هێرش بۆ سەر خۆمان لێکی دەدەینەوە و ڕۆڵ دەگێڕین. شەهیدە قارەمانەکانمان، پاراستنی شەنگالیان وەک ئەمانەتێک دایە دەستی ئێمە.