ئه‌نجومه‌نی ناوچه‌ی بۆرك-ی شه‌نگال دووه‌مین كۆنفڕانسی خۆی ئه‌نجامدا. له كۆنفڕانسه‌كه‌دا داوا له كۆمه‌ڵگه‌ی ئێزدی كرا كه له هه‌ڵبژاردنه‌كانی عێراقدا ده‌نگی خۆیان بده‌نه ئیراده‌ی خۆیان.
له سه‌ره‌تای كۆنفڕانسه‌كه‌دا حه‌سه‌ن حاجی هاوسه‌رۆكی ئه‌نجومه‌نی خۆبه‌ڕێوه‌به‌ریی شه‌نگال وته‌یه‌كی پێشكه‌ش كرد و هیوای خواست كۆنفڕانسه‌كه ببێته هۆی ڕێككه‌وتن و یه‌كگرتنی كۆمه‌ڵگه‌ی ئێزدی.
حه‌سه‌ن حاجی وتی: پێویسته ئێمه وه‌ك كۆمه‌ڵگه‌ی ئێزدی ڕێككه‌وین. كاتێك ئه‌مه به‌دیهات، كاره‌كانمان به‌هێزتر ده‌بن. ناوبراو سه‌رنجی خسته سه‌ر هه‌ڵبژاردنی ئه‌نجومه‌نی نوێنه‌رانی عێراق كه بڕیاره له ١٢ی ئایاردا به‌ڕێوه‌بچێت و وتی: پێویسته كۆمه‌ڵگه‌ی ئێزدی ده‌نگی خۆی بداته ئه‌وانه‌ی خزمه‌تی كۆمه‌ڵگه‌ی ئێزدی ده‌كه‌ن.
هه‌ر له كۆنفڕانسه‌كه‌دا رهام هجۆ هاوسه‌رۆكی ئه‌نجومه‌نی دیموكراتی له وته‌یه‌كدا ئاماژه‌ی بۆ ئه‌وه كرد كه سه‌ره‌ڕای زه‌حمه‌تی و به‌ربه‌سته‌كان، ئه‌نجومه‌نه‌كه كاری خۆی كردووه. وتیشی: ئه‌م كۆنفڕانسه بۆ ئه‌وان زۆر گرینگ و واتاداره.
هجۆ ئاماژه‌ی بۆ هه‌ڵبژاردنی داهاتووی ئه‌نجومه‌نی نوێنه‌رانی عێراق كرد و ده‌ستنیشانی كرد كه جاری یه‌كه‌مه پارته‌كه‌یان «پادێ» به‌شداری له هه‌ڵبژاردنه‌كان ده‌كات. له‌به‌رئه‌وه سه‌ركه‌وتن له هه‌ڵبژاردنه‌كان، سه‌ركه‌وتنی هه‌موویان ده‌بێت.
نوێنه‌رانی پارتی ئازادی و دیموكراتی ئێزدی - پادێ و ته‌ڤگه‌ری ئازادیی ژنانی ئێزدی له كۆنفڕانسه‌كه ئاماده بوون و وته‌یان پێشكه‌ش كرد و داوایان كرد كۆمه‌ڵگه‌ی ئێزدی له هه‌ڵبژاردنه‌كاندا ده‌نگی خۆیان بده‌نه ئیراده‌ی خۆیان.
له كۆتایی كۆنفڕانسه‌كه‌دا هه‌ریه‌كه له فه‌یسه‌ڵ ڕه‌شید و مه‌یان خوه‌دێدا وه‌ك هاوسه‌رۆكانی ئه‌نجومه‌نی كۆمه‌ڵگه‌ی ناوچه‌ی بۆرك هه‌ڵبژێدران. هه‌روه‌ها كۆمیته‌كانی كولتوور و هونه‌ر، داد، په‌روه‌رده، ئابووری و لاوان هه‌ڵبژێدران.
s.m
