پیرەمێردى شاعیر نامێ تەمامەش تۆفیقوو کوڕوو مەحموود ئاغاو کوڕوو هەمەئاغاو مەسرەفین، شاعیر و نویسەر و ڕۆنامەوانی نامداروو کوردی بییەن، ساڵەو ١٨٦٧ گەڕەکەو گۆیژەو شاروو سلێمانییەنە ئامان دنیاوە و ڕۆو ١٩ـو حوزەیرانوو ١٩٥٠ شاروو سلێمانینە ٨٣ ساڵینە عەمرەو خودایش کەردێنە.

پیرەمێرد حەوت ساڵیینە بریۆ پەی حوجرەو مەلا حسێن گۆچەی و چا وانای متەمامنۆ.

پیرەمێرد پێسەو حاجی قادری کۆیی، نالی، مەحوی، مەولەوی و زێوەر، مزگی بە مزگی و شار بە شار گێڵان و حەر ماوێوە و یاگێونە مەنەنۆ، دماو ئانەیە فرەو مزگییەکاو سلێمانیینە گێڵان و دمایی ڕووەش کەردێنە مزگییەکاو شاروو بانەی وەرکەوتوو كوردستانینە.

پیرەمێرد ساڵەو ١٨٩٨ ملۆ ئەستەنبوڵ، چا کۆلێژوو یاسێ موانۆ و حکومەتوو دەوڵەتوو عوسمانیینە چند پلێ میریێ و سیاسیێ ورمگێرۆ.

پیرەمێرد بوارو ڕۆنامەوانیی کوردیینە خزمەتێوی وەرەچەمش کەردەن و چندین ڕۆنامێش ئەرەمەرزنێنێ پێسەو ڕۆنامەو ڕەسملی کاتبی، ڕۆنامەو کوردی، تەعاون و تەرەقی، ڕۆنامەی ژینی و گۆڤاروو ژینی.

پیرەمێرد سەرسام بییەن بە نالى، مەولەوى، بێسارانى.

پیرەمێرد گرنگیێوی فرەش بە نەورۆزی دان، چونکوم باوڕش پاسنە بییەن، کە نەورۆز تەنیا کەردەیوە ئاویرێ و گێڵنای ئاھەنگی نەبییەن، بەڵکوم بابەتێوى چانەیە گەورەتەر بییەن، بە جۆرێو بییەن لاو پیرەمێردیوە ھامکێشەو مەرگی و ژیوایوە و هێماو شۆڕشی و ڕزگاربییەی گەلی بییەن.

پیرمێرد چند کتێبێوى چاپکریێش هەنێ پێسە:-

دیوانوو مەولەوی (ئەسڵ و ڕۆح)، ساڵەو ١٩٣٥ چاپخانەو وێشنە بە دووێ بەرگی چاپش کەردەن.

چیرۆکەو مەم و زینی

دوانزە سوارەو مەریوانی، ١٩٣٥

کتێبوو واتەو وەڵینا، ١٩٣٦

چیرۆکەو مەحمود ئاغاو شێوەکەلی،١٩٤٢

گاڵتە و گەپ ساڵەو ١٩٤٧ چاپ کریان، کە بڕێ ڕووەدایێ وەشێ دلێ کۆمەڵی کوردەواریینێ، پەی خوەی و پەی پەندورگێرتەینێ.

دیوانی مەولانا خالیدی نەقشبەندی – بە زنجیرە ڕۆنامەکەشنە وەڵاش کەردەنۆ.

شیعرەکاو وەلی دێوانە و بێسارانی، ئانێ دەسش کەوتێبا، ھەورامییوە کەردێنێش بە شێوەزاروو سلێمانی.

زنجیرە وتارێو دەربارەو تارێخوو میرنشینوو بابانی و خیڵ و تیرەکاو جافی و خەیلێ ڕووەدایێ تارێخیێ گرنگێ.

چا کتێبێ وەرشگێڵنێنێ سەروو زوانی کوردىی:-

گەشتوو ھۆنەرمەندێوی جیھانەنە

ڕۆمانوو کەمانچەژەنی، ١٩٤٢، تورکییوە کەردەنش بە کوردی.

نەورۆز جە شیعرە حەرە نامییەکاو پیرەمێردیین، کە ئاداروو ١٩٤٨دا نویستێنەش.

پیرەمێرد ١٩ـو حوزەیرانوو ١٩٥٠، شاروو سلێمانیینە ٨٣ ساڵیینە بو نەوەشیی شەکرەی و نەوەشیی گورچیلەیوە عەمرەو خوایش کەردە، سەروو داواو وێش تەپوو مامەیارەینە، ئانە کە جاران مەڵبەندوو گێڵنای جەژنەو نەورۆزی بێ چا ئەسپەردە کریا.