ساڵەو ٢٠١٤ بۆنەو ئەمرەو سەروو شەنگالیوە، گەلوو ئێزدی سەرنیشت و پانیشت و وەرنیشتوو کوردستانینە وەڵێ بیێوە. فرێشا پانیشتوو کوردستانینە ئەرەنیشتێ بیێ و کەمپەکانە بنەدارێ کریێ.

یۆ چا کەمپا کە فرەو گەلوو شەنگاڵیش چەنەبێنێ، کەمپوو قادیەی ١-٢ زاخۆو پارێزگاو دهۆکییەنە.

بە سەدان بنەیانێ شەنگاڵیێ کەمپوو قادیەینە ئەرەنیشتێ کریێ. ساڵەو ٢٠١٤ تا ئارۆ ئی کەمپە دەیان جارێ ئایرش گێرتەن و جارێوەیچ فڕۆکەی بۆردومان کەردەن.  

ئەرەنیشتاو کەمپەکەی ئانە دە ڕوێن بێئاوێنێ و ژیوایشا فرە زەحمەتتەر بییەن، دماو ئانەیە وەزارەتوو کۆچ و کۆچبەراو عێراقی قەرارش دا سەرجەموو کەمپەکا ٣٠ حوزەیرانینە بوزۆرە و سەرجەموو ئاوارەکا بگێڵیاوە یاگێ وێشا، ئیساتێ حکومەتوو پانیشتی گردوو پەنەوازییەکاو ژیوایش وەنەو گەلی بڕیێنێ و تەنانەت ئاوەو کەمپەکایچ دابینە نمەکەرۆ و ڕا نمەدۆ ئاوی بە ورەتەیچ بیاوۆ دەسوو ئەرەنیشتەکاش.

چی دمایوە وەزارەتوو کۆچبەرا واتش، حەرکەسێو وەڵێ ٣٠ی حوزەیرانینە بگێڵۆوە یاگێ وێش هامکاریی مکریۆ، ئانێ دماو ٣٠ی حوزەیرانیوە بگێڵاوە هامکاری نمەکریا.  

حکومەتوو پانیشتیچ هەوڵیێ ئانەیە مدۆنە ڕا وەنەو گێڵایوە ئاوارەکا بگێرۆ پەی ماواو وێشا.