هامسەرۆکی گردینوو پارتوو یەکسانی و دیموکراسیی گەلا (دەم پارتی) تونجەر باقرخان، هامسەرۆکی وەڵینەو گردینەو پارتوو دیموکراتیکوو گەلا (هەدەبە) پەروین بولدانە و بە یاوەریی شاندێو دژوو دەسملەرەگێرتەی شارەوانیی جۆلەمێرگی، دیدارشا چەنی خەڵکی بەردەواما.

شاندەکە سەرێ شارەوانیی گەڤەریشا دا و دمایی شاندەکە وەختوو سەردای کاسبکاراو شارەکەینە پۆلیس ڕاگێرییش وەنە کەردێ و پۆلیس بە قەڵغانەکاشا هەوڵێ ڕاگێریی سەردای شاندەکەی کەرێنێ، بەڵام بە یاوەری خەڵکی شاندەکە یوە یوەو کاسبکاراشا کەردێوە سەر و دژوو  پۆلیسی مدرێوە.

باقرخان وەختوو سەردای کاسبکارانە واتش خەڵکوو جۆلەمێرگی جارێوی تەر گێرتەی شارەوانیەکاشا ڕەت کەردۆ. دەسەڵاتداری وەڵین قەیومش سەپنان، پەوکای خەڵکوو گەڤەری فرە خاس قەیومی مشناسا، شایەتوو ئانەینە کە قەیوم چ کارەساتێوەش خوڵقنان.

باقرخان چەنی کاسبکارا زیاتەر واتش: "ئی جۆش و خرۆشەو ئارۆیە فرە مانادارا. با پێوە پەشتگیری وەنەو خەڵکوو جۆلەمێرگی بکەرمێ. پێویسا دژوو عەقڵی قەیوموازی بمردمێوە.  گەر ئێمە یۆگێرتێ بیمێ ئانە هیچ ستەمکار و قەیوموازێو نمەتاوۆنە دژما مدرۆ. داواتا وەنەو مکەروو شەو و ڕۆ پەی خاوەنداریکەرەی جە  شارەوانییەکا بە ئاگێ با. تا جارێوی تەر عەقڵی قەیوموازی چی خاکەنە سەرە بەرنارۆوە، خاوەنداری وەنەو  شارەوانی و پارتوو وێتا بکەردێ. باوەڕ بکەردێ ئادێ هیچ وەختێوە جە ئیرادەو گەلی قەوەتتەرێ نییەنێ. مدرامانوو شمە جە تانک و تۆپو ئادیشا فرە قەوەتتەرارێ. شمە حەرگیز  وەراوەروو سیستمی نکۆڵیکەری سەرەتا نەکۆمنانرە و بە ئیرادەو گەلیماوە پاسە بە سەرەبەرزی ممەندێوە. پەوکای نمەبۆ هیچ کوردێوی بەشکۆ تەنانەت وەردەموو بیناو ئاکەپەیچەرە بویەرۆ"