جێهات جە ١٣/١/ ٢٠٢٤ینە بە هۆشەمەندیێوە قەوەتۆ و هەستیاری جەنگیوە بەشداری چالاکی مېڎانوو مڎرامانوو کەشوو هەکاریش کەرڎ؛ تا دما گوللۍ بە ئیراڎۆ جەنگش کەرڎ و گەشمەرڎە بی.

جێهات باگەر سەرو ڕێچکەو مڎرامانینە تەسلیم بیەی و شکس ڕەڎ کەرێوە  و جە ساڵەو ٢٠١٩ینە بە هەستێوە بەرزۆ ۋێش یاۋنا بە کەشە ئازاڎەکا کورڎەسانی. ئێمە سەرو تەپێوە هەرمانە کەرێنمۍ و ڕاکۍ وینێنمۍ. کە جێهات چنی چن هامڕێوە بەرەو لاو ئێمە مەیا. جە لووایڕانەیشەنە، جە زەردەخەنەو میاچەمایشەنە، جە باوشیکەردەی یۆترینیمارە، جە جوڵەکاشەنە، هەست پانەی کەرێنی کە جێهات فرە دڵوەشا، بە جۆش و خرۆشا پەی بەدیئاورڎەو وەرمەکا زاوڵەیی ۋێش.

جێهات سەرەڕاو ئانەی تازە ئامابۍ کەش، بەڵام فرە عال جە چېوەکا یاوێنە. هەر جە ڕۊی یووەمۆ بەشدارو دلۍ کاری پراکتیکی بی. فرە زوو فێروو ژیۋای کەشی بی. بە تایبەتمەندی کەسایەتی ڕەنجدەری و فیداکارییوە ئینەش ۋێشەنە بنیاڎ نیابۍ. گرڎ کارێوە فرە بە عالی جابەجۍ کەرۍ و مۊچیاری هامڕایەکاش گێرۍ گۆش.

بە باوەڕدارییوە بەشداروو دلۍ کاری پەروەردەیی بی. چونکی زانۍ ئینا چکۆ و پەی چێشی ئینا چا. هەر چێوۍ ڕۊشن نەبیۍ لاشۆ پرسیارەش جە بارۆ کەرۍ. ئانەیچش زانابیۍ بەرش بڕۍ، حەجگیز ئانەی نەشارێوە.

بەجۆش و خرۆشۆ ئەرکەکاش جابەجۍ کەرۍ

بە ژیۋایە سادەکەشۆ هەرکارێوەش کەردۍ جە دڵۆ و بە جدیی کەرێش. گرڎ کاتێ بە شێوێوە جیاواز تەماشەو چێوەکا کەرۍ. دماو ئانەی ئەرکەکەش تەمامنا، بە جۆش و خرۆشۆ لووۍ پەی ئەرکېوە تەری. گرڎ کاتێ کۊششکەرۍ پەی ئانەی گەنجەکا بەڕێکوستەی بکەرۆ. فرێوە جە گەنجاش بەشدارۍ دلۍ ڕیزەکاو گەریلای کەردۍ.

گەرەکش بۍ بەشداری جەنگە قورسەکا بکەرۆ

دماو ئانەی دەوڵەتو ئەرەگیروو تورکی، هجوومەکېش پەی سەرو ئاڤاشین، زاپ و مەتینای زیاتەرۍ کەردۍ، گەریلاکۍ کورڎەسانی  مڎرامانۍ بێهامتاشا نیشانەدا. پۊکەی جێهات جە دڵۆ ۋێش پەی بەشداریکەردەی جەنگەکا پێشنیارکەرد. بە دڵسۆزی و هەڵوێسی بەرزوو ۋێشۆ ئامادەیی ئانەیشە نیشانەدا کە ئامادەن جە هەر یاگێنە بۆ بەشداری مڎرامانی بکەرۆ. بیەبۍ بە سابۆتاژوانێوە شارەزا. پەیوەس بە جەنگوو مەڕەکا و یەکنییە گێڵیارەکاوە زانا بۆ. سەرو ئی بنەمایۍ لووا دلۍ مېڎانەکا جەنگی جە مەتینانە.

جە مەتینانە بەشداروو چڼین کارا پراکتیکی بی. جە گرڎ مېڎانێنە، پەی هۊرکوای سەرو مۊڵگەکا دوژمنی سەرمەشق بۍ. پەی ئەنجامدای چالاکیەکا جە هەر مېڎانێنە بیۍ ئەرکداربۍ.

پېسە پسپۆرێوە لووا دلۍ جەنگی                                       

ژێهات جە چالاکی ١٣/١/ ٢٠٢٤ینە جە مېڎانوو مڎرامانوو کەشوو هەکارینە بە ئەرکوو ۋەرپرسیاری ۋێش هۊرئێست. بە هۆشمەندی و هەستیاری جەنگیوە بەشدارو چالاکی بی. ئاگاڎاروو ئەرک و ۋەرپرسیاریەکەیش بۍ. پی جۊرە تا دما گولۍ مڎرامانش کەرڎ و گەشمەرڎەبی.

پەی نەتەوەی و وڵاتەکەیش جەنگ کەرۍ

جێهات گەنجێوە کوردی بۍ، بە زەریفی و ئەنەیاوای جە تاریخ، چاند و زۋانی ئاگاڎاربۍ. هەمیشە خەریکوو ۋەنایۆ فەلسەفەو ڕابەر ئاپۆی بۍ، کۊشش کەرۍ چنەش بیاوۆنە. بی بە جەنگەوانوو وڵاتی و نەتەوەو کوردی. بە دما چالاکیەکاش ئانەش نیشانەدا کە چن گەریلێوە قارەمان بۍ.