بەرئاوەرەی سینەماییە بەهارە لالەییە جە سەرهۊرداو "ژەنۍ، ژیۋای، ئازاڎیی"نە دماو کوشتەی ژینا ئەمینیۍ جە ئێرانەنە، زیڼانیە کریا، حەر جە زیڼانەنە کوشیا و بەبێ ئاگاڎاری بنەیانەکەیش ئەسپەرڎەکریا.

بەهارە ساڵەو ٢٠٢٢ سەروبەنڎوو سەرهۊرداو "ژەنۍ، ژیۋای، ئازاڎیی"نە پەی ماوەو ١٠ ڕووا دەسبەسەرەکریا، جە ساڵەو ٢٠٢٣ ېنە هەمدیسان گیریاوە و وزیا زیڼان. دماو چن مانگۍ جە گېرتەیش حیچ زانیاریېوە جەبارەشۆ نەبۍ.

گرڎوو کۊشش و سەردای خێزانەکەیش پەی چڼین ئەرەمەرزیۍ دەوڵەتی پەی زانای ئاژەو کناچەکېشا، بێ ئەنجام بۍ.

"با کوشتەکەیش ڕۊشن بکریۆوە"

ئینستیوتی کوڵەفیلموو خانەو سینەمایی ئێرانی داواش جە حکومەتی کەرد سەبارەت بە مەردەی گوماناویی بەهارە لالەیۍ واچېوە دەموودەسی بڎۆ.

دماو هەواڵوو وەڵابیەیۆ کوشتەیش جە زیڼانەنە، سەرۆکوو دەسەی ڕاوەبەری ئینستیوتی کوڵەفیلمی سەر بە خانەو سینەماو ئێرانی، داواو ڕۊشنکەردەیۆ ڕووەداکەیش کەردە، ئینستیوتەکە سەرو ماڵپەڕی ڕەسمی ۋېشۆ واتش: "سەرەوەشی جە ئەنداماو خانەو سینەماو ئێرانی و گلېرگەو کوڵەفیلموو ئێرانی مکەرمۍ. داوا مکەرمۍ ئەوەکۊڵیایۍ ڕۊشن سەروو ئی ڕووەدایە بە ئېشەیە بکریۆ".