گەریلۍ یەژا ستاری بېریتان ئامەدە باسش چانەیە کەرد کە فرۆکە سیخوڕی و جەنگیەکۍ دەوڵەتو تورکی جە ئاسمانوو کورڎەسانینە یۊ بە یۊ جە لایەنو گەریلایوە وزیارە وار و ئاماژەش پانەیە کەرد هەمیشە هێڵۊ مڎرامانی جە کورڎەسانەنە سەرەگنۊ.
فرۆکە سیخوڕی و جەنگیەکۍ دەوڵەتو تورکی جە ئاسمانوو کورڎەسانینە یۊ بە یۊ جە لایەنو گەریلایوە وزیارە وار. گەریلۍ یەژا ستاری بېریتان ئامەدە پەیوەس بە جەنگی جە هەێمەکاو پارېزنای مەدیاینە قسێش کەردۍ و ئاماژەش پانەی کەرد دەوڵەتو ئەرەگیروو تورکی ۋەرا ۋەر بە ئیرادەو گەریلای ئینا تێکشیەینە.
جە سەرەتاو قسەکاشەنە بێریتان ئامەدە سەرنجش وست سەرو گۆشەگیری سەختوو سەرو ڕابەروو گەلوو کوردی عەبدوڵا ئۆجالانی و واتش: "دەوڵەتو ئەرەگیروو تورکی جەنگێوە سەخت ئیمراڵینە جە کەسایەتی ڕابەر ئاپۆینە بەرۆڕاوە. دووژمن دماو ئانەی ۋەرا ۋەر بە ئیرادەو مڎرامانوو ڕابەر ئاپۆی شکسش ئاورڎ، ئینجا هجوومەکێش زیاتەرۍ کەردۍ. بەڵام ئی جەنگە ڕۆ بە ڕۆ زیاتەر دەوڵەتو تورکی وزۊنە دلۍ زەلکاوەو شکسییوە و دلېنە مشۆ. ئی شکستێچە تەنیا جە ڕوو سەروازییوە نیەنۍ، بەڵکم جە هەمان وەختەنە جە ڕوو ئابووری و سیاسیچۆن. دەوڵەتو تورکی ۋەرا ۋەر بە گەریلای هجوومی قڕکاری مکەرۆ. چی هجوومانە گازی کیمیاوی و چەکی قەڎەغەکریا بەکاربەرۆ. جە ۋەرا ۋەرەنە هێزەکاو هەپەگەی و یەژا ستاری بە مڎرامانۆ جوابوو ئا هجووما مڎۆوە. جە ڕابەراتیماوە فێرۍ مدرامانی بیەیمۍ، ڕابەرما جە ئیمراڵینە بە ئیراڎۆ مڎرامان مکەرۆ، ئێمەیچ جە هەرێمەکاو پارېزنای مەدیاینە ئینایمۍ مڎرامانەنە.
یۆ بە یۆ فرۆکە سیخوڕی و جەنگیەکۍ وزیارە واری
گەریلۍ یەژا ستاری بێریتان ئامەدە ئاماژەش پانەی کەرد، دەوڵەتو ئەرەگیروو تورکی بە بەکارئاوردەی چەکی کیمیاویی گەرەکشا گەریلای دلېنەبەرۆ و واتش: "دەوڵەتو ئەرەگیروو تورکی حەجگیز نمەتاوۆ گەریلای دلېنە بەرۆ. ۋەروو ئانەی گرڎوو هێزی تەکنیکی و ڕێبازەکاو دەوڵەتو تورکی جە تەرەفوو گەریلایوە پوچۍ مکریاوە، ئینەیچ پاسشە بە دوژمنی کەردەن پەی بەرشیەی جە شکسەکاش چەکی کیمیاوی بەکاربەرۊنە. پی ڕا پیسۍ و دژە مرۆڤایەتیۍ، گەرەکشا ئەنجام بەدەس بارۆنە. سوپاو تورکی حەرچنڎە تەکنیکەکا جەنگی وەڵۍ وزۆ، جە ۋەرا ۋەروو ئانەینە گەریلا یاگەگیرش هەن و ئا تەکنیکەو دوژمنی پوچ مکەرۊوە.
فرۆکە سیخوڕی و جەنگیەکۍ دەوڵەتو تورکی، کە هەمیشە یاگۍ پروپاگەندەو دەوڵەتی بێنۍ، جە تەرەفوو گەریلایۆ وزیارە واری. دڎنێوە جە ٢٧و گوڵانی، دڎنێوەتەر جە ٦و حوزەیرانینە وزیێرە واری یانی جە ماوەو ١٠ ڕووانە دووۍ فرۆکۍ سیخوڕیۍ وزیێنێرە واری. دەوڵەتو تورکی کۊشش مکەرۆ ئینیشا بشارۊوە، بەڵام ئیتر گرڎ کەسێ ئانەش پەی بەرکۊت کە چنی تەکنیکوو سوپاو تورکیای جە تەرەفوو گەریلایۆ دلێنەبریۆ. فرۆکەی سیخوڕی دەوڵەتو تورکی یۆ بە یۆ جە ئاسمانوو کورڎەسانینە وزیارە واری. هێڵۊ مڎرامانی جە کورڎەسانەنە گرڎ وەختۍ سەرە گنۆ."
