کۆن-مەد نوێنەرۍ و مېمانەکێش پەی چوارەمین گلېرۊبېیەی میامینی جە شاروو بێرگیش گلادباخی ئەڵمانیاینە کوۍ کەردێوە.

پێکئامایەکاو کۆن-مەدی و هامسەرۆکاو کەجەدەکە-ئە ئەنگین سەڤەر و زوبەیدە زومروت و سیاسەتمەداراو کوردی تاراوگەنە بەشدارێ کۆبییەیوەکەی بیێ.

کۆبییەیوەکەی کریا دیاریی پەی ئازادیی ڕابەروو گەلوو کوردی عەبدوڵا ئۆجالانی و گەشمەرداو کۆشیای ئازادی و بە دەیەقێوە  ڕێزگێرتەی دەسش پەنە کەرد.  

دمایی هامسەرۆکوو کۆن-مەدی ڕوکەن ئاکچا تیشکەش وستە سەروو گۆشەگیریی ڕابەروو گەلوو کوردی عەبدوڵا ئۆجالانی و واتش: "گۆشەگیری کاریگەرییش سەروو گردوو کوردستانیوە هەن. پێسەو شمە مزاندێ. یەرە ڕۆی دمایینە کوردستان مسۆچۆ. ئینە دوژمنایەتیین. خیانەتا، پەی دلێنەبەردەی کوردا گرد ڕاێوە تاقییە مکریۆوە".

هامسەرۆک کەرەم گۆک تیشکەش وستە سەروو گۆشەگیریی ڕابەروو گەلوو کوردی عەبدوڵا ئۆجالانی و دمایی سڵامش وەنەو مدرامانوو وەرنیشتی و شەنگالی و مەخمووری کەرد،  سڵامش وەنەو مدرامانوو "ژەنی، ژیوای، ئازادیی" کەرد.

 هۆڵەکەنە درووشموو "بژیوۆ سەرۆک ئاپۆ" و "بژیوۆ مدرامانوو زیندانەکا" بەرزێ کریێوە.

دماتەر ورچنیەی دیوانی کریا، هامسەرۆکوو کەجەدەکە-ئەی ئەنگین سەڤەر پەی دیوانەکەی هورچنیا، قسێوەش پێشکەشە کەردە و واتش: "ئێمە جە ٢٥ەمین ساڵیادوو گۆشەگیری و ١٠٠ەمین ساڵیادوو لۆزانینە مژیومێ. جە کەسێتیی ڕابەر ئاپۆینە مدرامانێوی تارێخی هەن. سەروو ئی بناغەیە مەبارەکبایی وەنەو ڕابەر ئاپۆی مکەرمێ، کۆبییەیوەکەیما مکەرمێ بە سەوقاتی پەی ڕابەر ئاپۆی".

هامسەرۆکی کەجەدەکە-ئەی زوبەیدە زومروتە واتش: "کەسێتی هامڕا زیلانێنە، سەرەو ڕێزی پەی گردوو گەشمەرداو شۆڕشی مکۆمنوورە، پێسەو ژەناو کوردی، ئەگەر ئارۆ ساعیب مافێنمێ، ئانە سەیەو زیلانێ و سارێ و بێریتانێ و ژەنە کۆشەران، کە ئێمەشا یاونایمێ ئی ڕووە".