چالاکەی میسرییە د.سەحەر حەسەن ئەحمەدە سەبارەت بە گۆشەگیرکەردەی رابەروو گەلوو کوردی عەبدوڵا ئۆجالانی قسېش پەی ئاژانسوو هەواڵوو فوراتی (ANF)ی کەردۍ.

د. سەحەر حەسەن ئەحمەدە سەرەتا ئاماژەش بە کاریگەری عەبدوڵا ئۆجالانی سەرو جمیەری سیاسی و کۆمەڵایەتیی کەرد و واتش، "ئۆجالان یۆ جە کاریگەرتەرین رابەرا دەنگوو کوردین و بەرهەمەکېش لووېنۍ دلۍ قووڵایی تاریخوو کولتوری و سیاسی گەلوو کوردی. ئۆجالان هامشێوەو 'کۆنفیدراڵیزمی دیموکراتیک'ی مۆدێلەکۍ یاگەگیروو دەوڵەتی نەریتیش پېسە تیۆریەکا کۆمەڵایەتی و سیاسی جیاواز پێشکەش کەردۍ. جە ڕاو ئا تیۆریاوە گەرەکشا گلېرگېوە کە پەشتی بە پێوەرە ژیۋای ئاشتیانەو کولتورە جیاجیاکا، دیموکراسی راسەوخۆی بەسۆنە، بنیاڎ بنیۆ. ئۆجالان رەخنە جە سیستمی جیهانی مگېرۆ کە سەرو بنەماو سەرمایەداری، کۆلۆنیالیزمی و ئیمپریالیزمی ئەرەمەرزیان، پەی ئامای دی یەکسانی کۆمەڵایەتی و دادپەروەری ئەڵتەرناتیڤ وزۆنە ڕووە. بەرهەمەکېش پەشتی بە ئەزمونێوە درێژمەودای کەسیی ئەرەکۊشای سەروازی و سیاسی بەسانۍ. ئا ئەزمونە پەیوەس بە دژواری و تەنگوچەڵەمەکا زانیاری بە قیمەت پێشکەش مکەرۆ. بەرهەمەکاو مژارەکا دادپەروەری کولتوری کۆمەڵایەتی وزۆنە ڕووە، گرنگی بەقوەتکەردەی ژەنا و مسۆگەرکەردەی یەکسانی رەگەزیی کۆمەڵایەتی دەسنیشان مکەرۆ. ۋەروو ئانەیچ ۋەنایۆ بەرهەمەکاو ئۆجالانی پەیوەس بە حەقەتینەو کوردسانی، سیستمی کۆمەڵایەتی و سیاسی و پەی خوڵقنای تیۆرۍ یاگەگیری یاردیدەر مبۆ، حەرپاسە پەی ئا کەسا کە گەرەکشانە بە شێوېوە رەخنەیی تەماشەو سیستموو ئیساتۍ جیهانی بکەرا بۆ بە سەرچەمېوە گفتووگۆی و ئەوەکۊڵیای گرنگی".

د. سەحەر حەسەن ئەحمەدە سەبارەت بە گۆشەگیری دژواروو ئیمراڵیچ واتش، "ئانەی تورکیا مکەرۊش سیاسەتی چەپەڵ و ستەمکارانەو ئا دەوڵەتیە بەروزۆ. ئا رژێمە نەک هەر تەنیا گۆشەگیری جەستەییا، جە هەمان وەختەنە کۊششۍ سیستماتیکا پەی دلېنەبەردەی و ئەسڕیەیۆ ئەندێشە و ئشناسنامەو ئەرەکۊشای کوردا. جە روو ئەخلاقی کۆمەڵایەتیوە ئا سیستمە فرەو لایەناوە متاویۆ ئەوەکۊڵیایش جەبارۆ بکریۆ. جە دژوو مرۆڤایەتیا و پاشێلکەردەی شکۆمەندیا. رژێموو قڕکەردەی ئیمراڵی نمونېوە چېرپا وستەی شکۆمەندی مرۆڤەکان و پاشێلکەردەی مافەکا مرۆڤین. ئامانجوو سیستمی ئانەنە کە مرۆڤەکا جە مافەکا پېسە ئشناسنامە، کولتوری و سیاسی بێبەش بکەرۆ. رژێمەکە بە ستەمکەردەی ۋنەو رابەرا پېسە ئۆجالانی گەرەکشا جمیەرەکا ئازاڎیی و رۆحی هەرەوەزی و پێوەرەیی دلېنە بەرۆ. سەرەڕاو هەلومەرجی دژواریچ ئۆجالان و ئانۍ ئینۍ چنیش زیڼانەنە ۋېڕاگری مکەرا، ئانەیچ قیمەتېوە فرە گەورەی مەعنەوی نیشانە مڎۆ".

د. سەحەر حەسەن ئەحمەدە باسش چانەی کەرد کە بیەو رژێمێوە ستەمکاری جە ئیمراڵینە بە مەعناو لاوازکەردەی جمیەرە کۆمەڵایەتی و ئازاڎیوازەکان جە هەرێمەکەنە و واتش، "کۊششەکا پەی دەسەبەرکەردەی یەکسانی کۆمەڵایەتی و دادپەروەری ئاستەنگ مکەرۆ. بەهاکاو ئازاڎیی، دادپەروەری و مافەکا مرۆڤی جە تەماموو جیهانینە مشۊم پەرەشا پنە بڎریۆ و چەسپیانە. پاشێلکەردەی ئا بەهایا جە شۊنېنە بڕوائاردەی پانیشا جە ئاستی میان نەتەوەیینە لاواز مکەرۆ".