ئارۆ، پاڵوو مۆنۆمێنتوو گەشمەرداو ٩ـو حوزەیرانینە سەروو مەزاروو شاعیر شێرکۆ بێکەسیوە، شاروو سلێمانیینە، گرووپوو شناسنامەو کوردستانی، ساڵیادوو کۆکوشیى ٩ـو حوزەیرانوو ساڵەو ١٩٦٣ بەیاننامێوەش وەڵا کەردۆ.

بەیاننامەو گرووپەکەی ستارە عارف، چالاکەو گلێرگەی مەدەنی واناوە و دلێشنە ئامابێ، مشۆم عێراق داواو چەنەویەردەی جە لە کورداو پانیشتوو کوردستانی پاو جینۆسایی بەردەوامینە بکەرۆ  و واتیچش: چا ڕۆزگارانە دادگایێوی میاندەوڵەتی نەبێ تا ڕا گێرۆ چی تاوانە گەورا کە سەروو گەلوو کوردیرە ئامێ، وەراوەروو ئانەینە داوا مکەرمێ کە عێراق بۆ بە ئەنداموو دادگاو تاوانی میاندەوڵەتیی پەیماننامەو ڕۆمای ئیمزا بکەرۆ، تا گرەنتیی ئەوەخواینەبییەیوە کۆکوشیی و جینۆسایدکەردەی کوردی چی پارچەنە بکریۆ.

ئانەیچش وات، پێسە چەنی فرەو گەشمەرداو تاوانوو ئەنفالی و هەڵەبجەی بێقەبرێ و شۆنگومێ کریێنێ و خەیلێ قەبرێ بەکۆمەڵێ ورێنەدریێنیوە و تاوانبارێشا بەسزا نەیاویێنێ، جینۆسایدو ٩ـو حوزەیرانیچ بە هەمان شێوە نە بێسەروشۆنەکێش هەنێ و نە نامێچشا ساقە کریێنۆ و نە تاوانبارێچشا بەسزا یاویێنێ و نە قەرەبوو کەسوکاریشا کریانۆ، بەپێچەوانەوە بکوشە سەرەکییاو ٩ـو حوزەیرانی عەینوو جینۆسایدوو ساڵاو هەشتاکا و وەڵتەریچ دەسەڵاتی ستەمکاری پارێزنێنیێ و جە سزێ و دادگای ڕزگارێ کریێنێ.

ئاخروو بەیاننامەکەینە، گرووپوو شناسنامەو کوردستانی داواشا کەردە، هەرمانە بکریۆ پەی بەجینۆسایدشناسای کۆکوشیی ٩ـو حوزەیرانی.

ڕۆو ٩ـو حوزەیرانوو ساڵەو ١٩٦٣ـینە، شاروو سلێمانیینە ٨٢ هاموەڵاتێ بێتاوانێ گەورە جەلادوو ئاوەختوو بەعسی زەعیم سدیقی گەشمەردێ کەردێ، ئانەیچ بی بە ئەوەڵوو تاوانە دڕندانەكاو بەعسی دژ بە گەلوو كوردی و تا یاوا تاوانوو كیمیاویواراون و ئەنفالوو خەڵكوو كوردستانی.