دەسەو ڕاوەبەری مېیانو دەم پارتی ئاگاڎیش دا بە دەسەڵاتو تورکی و واتش: "دەس هۆرگێردۍ جە هرووژمکەردەی سەرو گەلوو کوردی و ئەرەمەرزیاکا و ئاشتیوازا. ئی سیاسەتە هرووژمکەرەو دەسەڵاتی گفتوگۆکا چارەسەری ژەعراوی مکەرۆ".
دەسەو ڕاوەبەری مېیانو دەم پارتی دەربارەو هرووژمە سیاسی و سەروازییەکا دۆڵەتو ئەرەگیرو تورکی ئەرەیاۋنێوەش وەڵاکەرڎۆ.
جە ئەرەیاۋناکەینە ئامان: "گەلوو تورکیای جە مانگەو تشرینی یووەمو ساڵەی ۋېیەردێوە درکش بە هیوا و جۆشێوە گۊرەی کەرد پەی گفتوگۆکا چارەسەری دیموکراتیکی پرسو کوردی و دیموکراتیزەکەردەی تورکیای و بە گرڎو هەرەکەتیشاوە پەشتیوانیشا جە پرۆسەکەی کەرد، جە ویستو ئاشتی و وڵاتێوە دیموکراتیکینە یۊشا گێرت. دەسەڵات بە هرووژمە سەروازی و سیاسییەکاش هیواو ملیۆنان کەسا پەی ئاشتی و دیموکراتیکی ماڕۊنە.
جە چن ڕۊی ۋېیەردەنە چڼین کەسۍ کە پەی مردنای جەنگی لوێنۍ پەی بەنداوو تشرینی، جە ئاکامو هرووژمەکانە گیانشا جە دەسدان. ناڕەحەتێنمۍ پانەی کە ئەکتەری کۆمیدی و شانۆکارو کوردی تاتەو تەیاری کە چی هرووژمانە بە سەختی زامڎاربی، عەمرەو خوڎایش کەرڎە. تاتەو تەیاری پېسە هونەرمەندێوە ڕاو ۋێش جە دڵو ملیۆنان کوردانە کەردۆ. پرسە و سەرەوەشی ۋێما ئاراسەو بنەیانەی و قەومو کەسو تەیاری و گەلوو کوردی مکەرمۍ. ئێمە بە تنی ئا هرووژما شەرمەزار مکەرمۍ. پی مەڵامەتۆ سڵام و هەستو هامسۆزی ۋێما مکیانمۍ پەی گەلا سەرنیشت و ۋەرکۊتوو سوریای، کە چن ڕوێوەن جە بەنداوو تشرینینە خاکەکەیشا پارێزنا و چالاکیی قەڵغانەی مرۆیی ئەنجام مڎا پەی دمایی ئارڎەی بە هرووژمەکا.
ئاگاڎیی مڎەیمۍ بە دەسەڵاتی، دەس هۊرگێرا جە هرووژمکەردەی سەرو گەلوو کوردی و ئەرەمەرزیاکا و ئاشتیوازا. ئی سیاسەتە هرووژمکەرەو دەسەڵاتی گفتوگۆکا چارەسەری ژەعراوی مکەرۆ.
داوا جە ملیۆنان هاموڵاتیا و ڕای گرڎینی دیموکراتیکی مکەرمۍ کە دژو هرووژمەکا دەسەڵاتی کە بە ئامانجو دلێنەبەردەی ئاشتی ئەنجامش مڎۆ، ناڕەزاییی دیموکراتیکی بەهێز نیشانە بڎا".
