قوربانییاو ئاویرەکەو مەنتێقەو چناروو ئامەدی و شەمرەخوو مێردینی بەخاک ئسپاریێ. هامسەرۆکی گردینو دەبەپەی کەسکین بایندەر، هامسەرۆکە گردینەکاو دەم پارتی تونجەر باقرخان و تولای حاتەم ئۆغۆللارییە و پەرلەمانتارێ و نوێنەراو ڕێکوزیایەکا و شاندێوی جەماوەریی سەرێ دەگاو کەلەکوو سەر بە شەمرەخیشا دا، کە پەرسەو ١٠ هاموەڵاتاش چنە نریانرە.

شاندەکە دماو سەردای پەرسەکا و سەرەوەشیی بنەیانەکا، قسێشا کەردێ.

هامسەرۆکی گردینوو دەبەپەی، کەسکین بایندەر واتش ئەرەمەرزیاو بەشکەردەی کارەباو دیجلە (DEDAŞ) وەرپەرسوو ئی کارەساتەینە، واتشۆ کە ئازارەکێ سەختەنە و باس نمەکریۆ، واتش: "سەرە پەی ئی دوژمنا نمەکۆمنمێرە، ئازارەکاو ئی گەلەیە نمەوینیانێ و دوژمنایەتیی ئی گەلەیە مکریۆ. دیجیتاڵ میدیانە دیما، کە چەنی دوژمنایەتیی گەلەکەیما مکەرانە. ئاندەش نەمەنەن پەی ئی قۆمیایە چەپڵێ بدریانە وەنە، پێسە دوژمنایەتییشا وەراوەرما زیاد کەردەن، حەرچی توانامانە بۆ پەی بنەیانەکاشا مکەرمێش".

هامسەرۆکی گردینوو دەم پارتی تونجەر باقرخان واتش گردوو بەڵگەکا بەرش موزانێ، کە کارەساتەکە بەرئەنجاموو کەمتەرخەمیی DEDAŞ بییەن، واتش: "پێویسا بکۆڵیەیمێوە چی خەمسەردییەو DEDAŞ . سەرەڕاو هۆشدارییەکاو گەلەکەیما DEDAŞ خەمسەردانە جووڵیێنێوە. DEDAŞ وەرپەرسا چی ئاویرەیە. پێویسا ئێگە پێسەو هەرێموو کارەساتی بشناسیۆ، پێویسا قەرەبووی زەرەرەکاو خەڵکی بکریۆوە".

باقرخان واتش وەختێو دەوڵەت کەسێو  دەگایەکا و کەشەکاوە موینۆ، دەیان هەلیکۆپتەرێ مکیانۆ، بەڵام خەڵک چێ مەرد، ئاژەڵەکێ مڕارێ بیێوە، کەسی نەدیێ و واتش: "دەس چی پەرسێ ورنمەگێرمێ، برین و ئازارەکاو گەلەکەیما ساڕێژ مکەرمێ".

هامسەرۆکەی گردینوو دەم پارتی تولای حاتەم ئۆغۆللارییە سەرەوەشییش وەنەو بنەیاکا کەرد و هومێدوو خاسبییەیوەیش پەی بریندارەکا واست، تیشکەش وستە سەروو کەمتەرخەمییەکاو DEDAŞ و واتش: "پێویسا بە ڕۆحی یۆگێرتانەوە مردمێ دژوو ئی سیستمەیە کە خەڵکوو ئێمە جیامازۆ پەی مەردەی،متاومێ بە هامکاری ئی خەم و ئازارا کەم بکەرمێوە. وەرپەرسی سەرەکیی DEDAŞ ا".

دمایی شاندەکە لوێ سەرێ دەگایەکای تەریشا دا.