مدرامان دژوو نیایرەو قەیومی جە چن شارېوەنە جە دوەمین ڕۊنە بەردەواما.

موش

ڕېکوستەی پارتوو یەکسانی و دیموکراسیی گەلا (دەم پارتی) موشی ۋەروودەم و بیناو پارتەکەینە ئەرەیاۋنېوەش ۋەناوە.

ئەنداموو مەجلیسوو گرڎیی دەم پارتی شارەکەی، یەعقوب یالچین کایا نیایرەو قەیومیش پېسە "کودەتای سیاسی" و حساب نەکەردەی پەی ئەنجاموو هۊرچنیەی و زەوتکەردەی ئیرادەو گەلوو کوردی ئشناسا، محەمەد سدیق ئاکیش نوێنەرو ملیۆنان ئیناسانا کوردین، واتش: "ئانەی زەوتکریان دیموکراسییا، زەوتکەردەی و تاڵانی و قبووڵ نەکەردەی ئیرادەو گەلین. ئینە ئەرەگیریا".

جەختش کەردۆ ڕا پی کودەتایە مەڎا و هیچ ئیرادېوە جە ئیرادەو گەلی بەقوەتتەر نېیا.

ئەنقەرە

ڕېکوستەو دەم پارتی ئەنقەرەی ۋەروودەم و بەرەو پەرلەمانینە ئەرەیاۋنێوەش ۋەناوە، جەماوەر ڕووبەڕوو ئاستەنگی پۆلیسی بېیېوە و ژمارېوە پۆلیسۍ دریاشا ۋنە، دماتەر ئەرەیاۋناکەی ۋنیاوە و پەرلەمانتارەو دەم پارتی بورجوگول چوبوکە قسېش کەردۍ و ئەرەیاۋناش نیایرەو قەیومی قبووڵ مەکەرا.

دماتەر جەماوەر لووۍ دلۍ پەرلەمانی، پەرلەمانتاروو دەم پارتی هەڤاڵبۊزداغ واتش: "ئینە کودەتای سیاسییا، دەستتا سەرو ئیرادەیماوە هۆرگېردۍ".

ئیستەنبوڵ

ناوەندوو چاندوو میزۆپۆتامیای ئەرەیاۋنېوە نویسیاش سەرو میدیای دیجیتاڵی وەڵاکەردۆ. ئەرەیاۋناش پېسە هونەرمەڼا پابەڼۍ مدرامانوو گەلوو ۋێشانۍ و ماچۊ: "ئی هەڵوێسەو دوژمنایەتی کەردەی گەلو کوردی بە هیچ جۊرۍ قبووڵ مەکەرمۍ و داوا جە گرڎوو هونەرمەڼا مکەرمۍ دژوو ئی زیهنیەتەیە هەڵوێس نیشانە بڎا. قەیوم گۊرەتەرین دوژمنوو هونەرین! قەیوم فاشیزما! قەیوم کودەتانە!".

ئامەد

پلاتفۆرموو پارېزنای و پەشتیوانی شارو ئامەدی، ۋەروودەم و دادگاو ئامەدینە کوۍ بېیېوە، جەماوەر جە تەرەفوو پۆلیسی وە گەمارۆدرۍ، جەماوەر بە چەپڵۍ و درووشمۍ گەمارۆکەشا شەرمەزارکەرد.

بەنامۍ پلاتفۆرمەکەیۆ سەردار کەسکین ئەرەیاۋناش نیایرەو قەیومی حیچ بناغېوە یاساییش نېیا. داواش کەردە دەس جە سیاسەتوو نیایرەو قەیومی هۊربگیریۆ و ڕېز جە ئیرادەو گەلوو جولەمێرگی بگیریۆ.