سوزان ئاکیپا پارێزنەرە جە نوسینگەو یاسایی سەدەی، چالاکەو تەڤگەرو ژەنا ئازادی گولدەم دۆغانە و پەڕلەمانتارەو ئەستەنبوڵو دەم پارتی ئۆزگول ساکیە پێوەس بە گۆشەگیری ئیمراڵی قسێشا پەی ئاژانسەکەیما کەرڎۍ.

چالاکەو تەژەئای، گولدەم دۆغانە باسش چانەی کەرڎ کە پەنەوازا سەرەتا گلێرگەو تورکیای جە چەمکو گۆشەگیری بیاوۆنە و واتش گۆشەگیری تەنیا پېسە ئەرەبڕیەی پەیوەندی بە جبەریۆ هۆرنمەگیریۆ و ئینەش وات: "ئارۆنە گرڎ کەسۍ جە تورکیانە ئینا چێرو کاریگەری گۆشەگیرینە. چونکی دۆڵەت پەی ئاساییکەردەیۆ گۆشەگیری گرڎو مېڎانەکا گلێرگەیش ئەرەگیرۍ کەردێنۍ و ئۆپراسیۆنی پەیوەندیدار مکەرۆ. ئینەیچ جە ڕاو سیستەمو پەروەردەی و یاساییوە ئاماڎە مکەرۆ. پۊکەی گلێرگە جە گۆشەگیری نمەیاوۆنە، فرە کەم چا ڕوانگۆ پرسیارەش هەنە."

'گۆشەگیری فاڕیان پەی پرسو کۆمەڵایەتی'

جە بەردەوامینە دۆغانە ئاماژەش پانەی کەرڎ کە ئانەی بەرهەمئاوردەی سەرو ڕەنجو گلێرگەی مکەرۆ گۆشەگیرییا و واتش: "ژەنی جە گلێرگەی سیاسی و ئابوورینەگۆشەگیرە مکریۆ. هەرپۆکەی ئەنەیاوای جە گۆشەگیری و جە دژ مردایۆیش ئەرکی سەرەکی مرۆڤایەتییا. گۆشەگیری بە سیاسەتەکاو جەنگی تایبەتی، ئاوەزیەتو پیایا و ئەنەیاوای دۆڵەتیوە فاڕیان پەی پرسێوە کۆمەڵایەتی و جە گرڎ یاگێنە مێوە ۋەردەمما." تەئکیدیچش کەرڎۆ دژ مردایۆ جە ۋەرا ۋەرو گۆشەگیریینە پەی ژەنا گرنگا، پەنەوازا پېسە ژەنا بە گرڎو هەرەکەتیشاوە دژو گۆشگیری مرداوە.

پەرلەمانتارەو بازنەو ئیستەنبوڵو دەم پارتی ئۆزگول ساکیە ئاماژەش پانەی دا کە گۆشەگیری بە ماناو زیاڎبیەی قەیرانەکاو ژەنا و کوشتەی ژەنان، گۆشەگیری بەردەوامیداین بە سیاسەتەکاو ئەرەگیری و پی جۆرە بەردەوامە بیە: "وەڵۍ گرڎ چێوێنە نمەبۆ گۆشەگیری بۆ. جە سیستەمی یاسایینە گۆشەگیری تاوانەی دژ بە مرۆڤایەتینە." ئەرەیاۋناش، ئاشتیێوە حەقەتینە بە لابەردەی گۆشەگیری سەرو ڕابەر ئاپۆی مڕەخسیۆ.

لاو ۋێچشۆ سوزان ئاکیپا پارێزنەرە جە نوسینگەو یاسایی سەدەی، ئاماژەش پانەی دا کە گۆشەگیری سەرو ڕابەر ئاپۆی نایاساییا و واتش: "جە حەقەتینەنە تەماشەو گۆشگیری مکەرمۍ جە گرڎ ڕوێوە بەرگنۆ کە گۆشەگیری سیسەتەمێوە ستەمی و زۆرداریییا. سیستەمو گۆشەگیری بەرش وزۆ کە تورکیا چڼە ماف و یاسا گەردوونییەکا پاشێلۍ مکەرۆ."

'گۆشەگیری هیچ بنەمێوە یاساییش نیا'

سوزان ئاکیپا دەسنیشانش کەرڎ جە کاتێنە تورکیا ۋێش پېسە دۆڵەتی یاسایی مشناسۆ، پەنەوازا گۆشەگیری هۆرگێرۆ و ئینەیچ ئەرکو دەسەڵاتدارییا و ئینەش وات: "گۆشەگیری سەرو بەڕێز ئۆجالانی هیچ بنەمێوە یاساییش نیا. ئا حەقیقەتەی ٢٥ ساڵێن ئێژا ئۆجالان باسش مکەرۆ بیەیش هەن، وە هێزو چارەسەری پرسەکاش هەن. هەرەکەتو دیموکراتیکبیەیش هەن، پرۆژە چارەسەرییەکێش ڕۆشنۍ و کۆنکرێتیێنۍ. مڎرامانێوە هەن کە نوێنەرو ئیراڎەو ئێژا ئۆجالانیا. پۊکەی لابەردەی گۆشەگیری دڎاننیاین بە مافە یاساییەکارە."