رۆو ٦و مانگەی ۋییەرڎۍ بە بەشداری هونەرمەڼا و هونەردۆسا، جە بازاڕو بۆلیڤاردینە جە شارو کەرکوکو پانیشتوو کوردەسانی، چێرو نامونیشانو (پێوەرە ژیۋای) هەشتەمین فێستیڤاڵی شانۆی کەرکوکی بە بەشداری هونەرمەڼا و شانۆکارا ١٤ وڵاتا دەسش بە هەرمانەکاش کەرد. جە ماوەو فێستیڤاڵەکەینە زنجیرێوە شانۆیۍ جاڎەی و شانۆیۍ دلۍ هۆڵی پێشکەشۍ کریۍ و جە ڕوانی ئایندەیچەنە ژمارێوە شانۆیۍ تەرۍ پێشکەش مکریا.

**

شەوەو شەممەی، بە مەراسیمێوە هونەری شارو کەرکوکو پانیشتوو کوردەسانینە فێستیڤاڵی شانۆی جاڎەی مېیاننەتەوەیی کەرکوکی چێرو دروشمەو (پێوەرە ژیۋای)نە ئەرەیاۋییا، سەرەتاو مەڕاسیمەکەینە، هونەرمەڼا و هونەردۆسا و شانۆکارا جە جاڎەو پارێزگاو کەرکوکینە کوۍ بیێوە و زەماۋنەشا گێڵنا، دماتەر دەسشا بە ڕاپیمای کەرد پەی ماوەو دووۍ کیلۆمەترا و بەدرێژایی جاڎەکەی شانۆو هەرمانەی هونەریێشا پێشکەش بە هاموڵاتیا کەردۍ.

 دماو یاوای هونەرمەڼا و شانۆکارا بە هۆڵو بۆلیڤاردی سەعات ٥:٣٠ دەیەقۍ وێرەگای دەس بە چالاکییەکا کریا کە چن نمایشێوە هونەری پێشکەش کریۍ و چڼین هونەرمەڼۍ خەڵاتو ئاڵتونی فێستیڤاڵیشا پنە بەخشیا.

'ئێساڵ فێستیڤاڵی فاڕمێوە پەی ناوچەکاو پێکئامایەکا تەری'

نەژاد نەجم سەرۆکو فێستیڤاڵی پەی ئاژانسو هەواڵوو فوڕاتی ی(ANF) قسێش کەرڎۍ و واتش: "ئی فێستیڤاڵە پەی ماوەو یەرۍ ڕووا بەردەوام بۆ، چا چوارچێوەنە یەرۍ وۆرکشۆپێما هەنۍ و هەرپاسە پەنج کتێبۍ چاپکریۍ تایبەت بە شانۆیما هەنۍ چنی پانێڵ و تۆژینەوەی، ئا کەرنەڤاڵ و مەڕاسیمە گۆرەی کە ئارۆ گرڎو شاریش مردنا یۆن جە هەنگامە گۆرەکا کە ساڵانە ئی فێستیڤاڵە وەڵێکۆتەی پۆ ۋێشۆ موینۆ، زیاڎ جە ٢٥٠ مێمانا جبەریما هەنۍ چی فێستیڤاڵەنە، ئا شۆنۍ کە دەسنیشان کریێنۍ پەی نمایشو شانۆکاری بریتییا جە جاڎەکا مېیانو شاری و زانشتگە و مۆڵەکا جە ۋێش گێرۆنە ئۍ ساڵ جیاواز جە ساڵا ۋییەردەی زیاتەر گرنگیما پانەی دان کە شانۆکا فاڕمێوە پەی ناوچە عەرەبی و تورکمانییەکان"

'ئی فێستیڤاڵە وێنێوە زەریفو کوردەسانیش نیشانەو جەهانیدا'

لەیلا مەجیدیە ژەنە ئاکتەرێوە سینەمای و شانۆینە و لەیلا سەبارەت بە فێستیڤاڵەکەی واتش: "فێستیڤاڵی مېیاننەتەوەیی شانۆیی جاڎەو کەرکوکی یۆن چا فێستیڤاڵا کە ساڵانە بەشێوێوە زەریف نیشانە مڎریۆ و ساڵ دماو ساڵی ئی فێستیڤاڵە سەرو ئاستی مېیاننەتەوەیی وەڵێکۆتەی زیاتەر بەۋێشۆ موینۆ، چی فیستیڤاڵەنە فرەو وڵاتاما دیۍ کە هەریۆشا و دەنگ و ڕەنگێوە تایبەت بە ۋێش بۍ، جە شارە زەریفەکەو کەرکوکینە گرڎو شێوە جل و بەرگۍ کوردی و زاراوەکا کوردی (سۆرانی، کرمانجی، کەلهوری، هەورامی و بادینی) چۍ ئامادەیشا بۍ ، ئینەیچ وێنێوە زەرفو کوردەسانیش نیشانەو جەهانیدا".

'تاتەم خەڵکو ۋەرکۆتین و ئەڎام پانیشتیەنە'

هەرپاسە لەیلا مەجیدیە، سەبارەت بە بەشداری کەردەیش چی فێستیڤاڵەنە واتش: "ساڵانی ۋییەردەنە بە بەرهەمی شانۆیی بەشداریم چی فێستیڤاڵەنە کەردەن، جە زاوڵەییۆ ئەکتەرەو شانۆی سەر جاڎەی و سەر ستەیجی، ئەکتەرەو فیلم و درامای بیێنا، من خەڵکو ۋەرکۆت و پانیشتوو کوردەسانینا، چونکی تاتەم خەڵکو سنەین جە ۋەرکۆتوو کوردەسانی و ئەڎام خەڵکو خانقینینە جە پانیشتوو کوردەسانی".

ئی فێستیڤاڵە مەبۆ بە مەڵامەتوو ئشناسای کولتور و هونەری کوردی بە جەهانی

لاو ۋێشۆ، مسەفا ئەحمەڎ ئەکتەری نامیەو پانیشتوو کوردەسانی، سەبارەت بە فێستیڤاڵەکەی واتش: "ئی جۆرە فێستیڤاڵە مېیاننەتەوەیۍ بانۍ بە مەڵامەتوو ئشناسایما بە ووڵاتا جەهانی ئینەیچ یاگۍ دەسوەشی میللەتەکەیمانە، ئی فێستیڤاڵاۍ دەوری گۆرەشا مەبۆ جە ئشناسای کولتوری و هونەری کوردی بە هونەرمەڼا ووڵاتا جەهانی، شارو کەرکوکو کوردەسانی گرنگی ۋێش هەنش پەی ئێمەی هونەرمەڼا کوردی، کەرکوک بەردەوام ڕووبەڕوو ستەمی بیەنۆ سەرو دەسو تەمامو رژێمەکا عێراقینە پۊکەی کۆششەکا ڕێکوزا فێستیڤاڵی شانۆی جاڎەی مېیاندەوڵەتی بەرز هۆرسەنگنمۍ، بەدرێژایی تاریخی شارو کەرکوکی هونەرمەڼۍ و رۆشنۋیرۍ هۆرکۆتێش چنەبیێنۍ، بەڵام داخەم نمەشۆ بەمەڵامەتوو ئانەی کە چێردەسۍ رژێمەکا وەڵتەری بیێنمۍ پۊکەی نەتاوانما هونەر و هونەرمەڼاما بە جەهانی بشناسمۍ".