هیچ هەواڵێوی بارەو دووێ برایاوە، کە زیندانێ سیاسیێنێ نییەن
دووێ بڕێ کە نامێشا پوریا و شوجاع منەتینێ و یارسانێنێ، بە تۆمەتەو بەشداری وێنیشانەداینە زیندان کریێبێنێ، هێزە ئەمنییەکا فاڕێنێوە پەی یاگێوی نادیارێ.
تۆڕەو هەواڵوو مافەکاو ئینسانوو کوردستانی وەڵاش کەردۆ، "پوریا و شوجاع منەتی، کە بۆنەو بەشدارییوە جە مەراسیموو ٢١ەمین ساڵیادوو مەردەی سەید خەلیل عالی نەژادی هونەرمەندی ئشناسیای و ڕابەرە دیاراو گلێرگەو یارسانی، گیریێ و زیندانیێ کریێبێنێ، ماوەو سزێکێشا بە شێوەو هەرمانکەردەی بەروو زیندانیوە و وێشناسای ڕوانە بە وەرپەرساو زیندانی ویەرنا.
ئانەیچش وستەن ڕووە، ڕووەکاو وەڵینە ئا دووە برێ بە مەبەسوو وێئشناسای ڕوانە لوینێ زیندان، بەڵام هێزە ئەمنییەکا بە هۆکارێوی نەزانییا گێرتێنێ و بەردێنێشا پەی یاگێوی نادیارێ.
ڕۆو ١٨و تشرینوو دووەموو ٢٠٢٢ هاموەخت چنی لوایڕاوەو وێنیشاندایەکاو سەرەوردای ژەنی، ژیوای، ئازادی مەراسیموو٢١ەمین ساڵیادوو مەردەی سەید خەلیل حالی نەژادی سەحنەنە کریا، بەڵام هێزە ئەمنییەکێ هجوومشا کەرد سەروو بەشداراو مەراسیمەکەی و چندین کەسێشا گێرتێ.
پوریا و شوجاع منەتی دووێ چا گیریایا بێنێ، کە دماو چند مانگێوە گیریای سزاو ساڵێوە زیندانی و دایوەنەی ٧٤ قامچییاشا ملەرە دریابێ.
مانگەکاو وەڵێنە کە پەی بەسەربەردەی سزێ لوێبێنێ زیندان، پنەشا واتێبێنێ کە متاوا ماوەو سزاکێشا بە هەرمانکەردەی بەروو زیندانینە تەمامنا.
