بارەو دەسملەرەگێرتەی شارەوانیی جۆلەمێرگی و گێرتەی محمەد سدیق ئاکشوو هامسەرۆکوو شارەوانیی جۆلەمێرگیرە، کە دەسەڵاتدار سزاو ١٩ ساڵا و ٦ مانگا زیندانیش پەی بڕیوە، سەرۆکوو سەندیکاو پارێزنەرا جۆلەمێرگی ئەرگون جانان پەی ئاژانسوو هەواڵوو فوراتی (ANF) قسێش کەردێ.

'قەرارێوی نایاسای و سیاسییا'

سەرۆکوو سەندیکاو پارێزنەراو جۆلەمێرگی ئەرگون جانان ئاماژەش دا ئا سزێ، ملوو محمەد سدیق ئاکشیرە سەپیێنە نایاساییەنە و بەتەمامی سیاسییەنە. جانان واتش، کە دەسەو باڵاو ورچنیەیەکا هیچ قۆرتێش نەدی چانەیە کە محمەد سدیق بۆ بە هاسەرۆکوو شارەوانی و دماییچ مەرسوموو دەسبەکاربییەی شارەوانیی وێش ورگێرت. جانان واتش ساڵەو ٢٠١٤دا دۆسیێوە سەبارەت بە محمەد سدیق ئاکشی کریاوە. چا وەختۆ هیچ وەڵیکەوتەێوە دۆسیەکێنە ڕووە نمەدۆنە، بەڵام دماو ورچنیەیەکا ماوەو مانگێوەنە گردوو دۆسیەکێ تەمامە مکریۆ و ڕاو دادگایوە سزاش مدانێ. جانان ئاماژەش پانەیە دا چون هیچ بەڵگێوی گونجیا دۆسیەکێنە نییا پەنەوازا ئا دۆسییێ ورەبشنیۆوە.

'بە یەکسانی یاسا نمەیاونیۆ یاگێ'

جانان وستش ڕووە یاسا بە یەکسانی نییەنە و واتش: " پەی نموونەی وەرنیشتوو تورکیاینە وەختێو سەرۆکوو شارەوانی پۆستەکەیشنە دوور موزیۆوە، ڕا مدریۆ بە ئەنجوومەنوو شارەوانی کە کەسێو دلێ وێشانە وربچنا. هەڵبژێرن. ڕاستەوخۆ دەسش ملەرە نمەگێریۆ. ئانە پێویسا بە پاو یاسێ بکریۆ ئینەنە. بەڵام ئینە پەی  شارەوانییەکاو کوردستانی ڕاش پنە نمدریۆ. پەی شارەوانیی جۆلەمێرگیچ حەر پێسنە بێ."

'بە ڕۆشنی هەقە وەنەو ئیرادەو گەلی مکریۆوە'

جانان ئاشکراش کەرد، ئینە پەی جاروو یەرەمییا، کە ئیرادەو گەلی جۆلەمێرگەنە دەسش ملەرە مگیریۆ و واتش: "ئینەیچە بە ماناو ئانەیە مێ بەئاشکرا هەقە جە ئیرادەو گەلی مکریۆوە. گەل پەیاموو 'چێش بۆ با بۆ ددانتا نمەنیەیمێ پۆرە و وێما ڕێسا و یاساکا میاونمێ یاگێ' ڕووەو  دەسەڵاتیرە مداوە. پێویسا بزانیۆ گەل ددان بە ڕێژێمی قۆرخکار و دەسملەرەگیریرە نمەنیۆ. نموونەیچ دەرنجامەکاو ورچنییەی ٣١وو ئادارییەنێ."