جەمۆبییەیی جەماوەریینە، کە جۆلەمێرگنە دژوو دەسملەرەگێرتەی ئیرادەو گەلی کریا، ئەرەیاونییا، کە سیاسەتوو نیایرەی قەیومی وەراوەروو کۆشیای گەلینە مەحکووم بە شکستین و وچیا "ئێمە هیچ ئیرادێوی بەرزتەر جە ئیرادەو گەلی نمەشناسمێن."
دژوو دەسملەرەگێرتەی شارەوانیی جۆلەمێرگی، کە ٣ی حوزەیرانینە لاو دەوڵەتوو ئەردۆغانیوە کریا، ئارۆ بە دروشموو "شارەوانیی هینوو گەلیا، ئێمە ڕا بە دەسملەرەگێرتەی نمەدەیمێ" جەمۆبییەیێوی جەماوەری کریا. بە دەیان هەزار کەسێ بەشدارییشا جەمۆبییەیەکەینە کەرد، جەمۆبییەیەکە بە دەیەقیو ڕێزگێرتەی دەسش پنە کەرد و بە پێشکەشکەردەی وتارەکا بەردەوامییش بێ.
قادر شاهین، هامسەرۆکوو دەم پارتی شارەکەی جە پێشکەشکەردەی وتارەکەیشنە سپاس و ڕێزش ئاراستەو بەشدارا کەرد، هەرپاسە هامسەرۆکەو شارەوانیی جۆلەمێرگی ڤیان تەکچە، سڵامش وەنەو گردوو زیندانییە سیاسییا و هامسەرۆکوو شارەوانیی سدیق ئاکش کەرد، کە سزاو ١٩ ساڵا و ٦ مانگا زیندانییش پەی بڕیانۆ. تەکچە ئاماژەش کەرد، یاساو دوژمنایەتیی دژوو گەلوو کوردی لاو قەیومە سەپیایەکاوە میاویۆ یاگێ و واتش: "ئی قەرارە لاو دادگایوە نەبییەن، بەڵکوم بارەگاو ئاکەپەیوە دریان. ئا کەسە پێسەو قەیومی دەسنیشان کریان، پێسەو پەڵێوی سیاوین چی شارەنە. ئی گەلە جارێوی تەر چێ نیشانەش دا کە قەیومشا گەرەک نییەن. گەلەکەما تا ئاخر دژوو داگیرکەردەی ئیرادەیشا مکۆشیا. ئێمە ئی شارەتا چنە ورمگێرمێوە. ئێمە هیچ ئیرادێوی بەرزتەر جە ئیرادەو گەلی نمەشناسمێ."
پەیاموو ئاکشیچ جەمۆبییەیەکەینە ونیاوە و دماتەر پەیاموو سەرجەموو پارت و ڕێکوزیایەکا لاو نوێنەرەکاشاوە ئاراستەو جەماوەری و گەلە ئازادیوازا کریا، بەگردی پەیامەکانە خاوەنداریی وەنەو ئیرادەی یاسایی گەلوو جۆلەمێرگی کریا و داواو وەرفراوانکەردەی چالاکییەکا کریا و واتشا گەلەکەما ئی دەسەڵاتدارییە گەندەڵەیە ورمشانۆوە و ئیرادەی ڕەواو وێشا مپارێزنانێ.
میانەو ئەرەیاونای پەیامەکانە چالاکاو تەژەئای ڕاو عەداڵەت فیدانێوە واتشا، ژەنی دەسکەوتەکاشا مپارێزنانێ.
جەمۆبییەیەکە بە جۆشوخرۆشوو بەشداراوە، تا دێرێ بە واتەیوە دروشمەکا درێژەش بێ.
