جمېیەرو کولتور و هونەری (تەڤ-چاند) سەبارەت بە ڕاپیمای گۆرەو ١٦و تشرینو دووەمی جە کۆڵنەنە بانگەوازێوەش ئەرەیاۋنا و چنەشەنە ئاماژە بە جەنگی جەهانی یەرەمی کریان و ئانەیچ وزیان ڕووە، کە"جمېیەرو ئازادیی کوردەسانی بە سەرمەشقی رابەر ئاپۆی سات دماو ساتی رەوتو تاریخی فاڕۆنە. هەڵوێسو جەنگاوەرا قارەمانی پېسە گەشمەرڎە ئاسیە عەلیۍ و رۆژگەر هێلینی بە عالی ئانەش بەروست، کە پەنەوازا ئەرەکۆشای بە چ شێوێوە ئەنجام بڎریۆ. هەر هێزێوە کە هەوڵو کوشتارو گەلوو کوردی بڎۆ، سەرەتا مشۆم رووبەڕوو مڎرامانو رابەرایەتی و گەریلای بۆوە. چالاکییەکەو گەشمەرڎە ئاسیە عەلیۍ و رۆژگەر هێلینی جە سەروبەڼو ساڵیاڎو ئازادی کۆبانێنە مەعنێوە زیاتەرش پێڎا کەرڎەن. کۆبانێ چێرو فەرماندەیی و سەرمەشقایەتی ژەنا جەنگاوەرینە ئازاڎ کریا و بی بە بەهێوە مرۆڤایەتی. هەر ئینەیچ پاسشە کەرڎ کە رژێمو فاشیستو ئاکەپە-مەهەپەی تا ئیساتێچ بەردەواما جە هرووژمە وەحشیانەکاش دژو خەڵکو کۆبانێ.

هەزاران گەشمەرڎۍ راسپاردەو ۋێشا یاۋونا بە جەهانی و ئا کەسێشا وستۍ سەتڵەو شەخەڵو تاریخیۆ کە واچێنۍ 'کۆبانێ ئینا کەوتەینە و هاکا کۆت'. مەڵامەتو دژمنایەتی ۋەرا ۋەر بە کۆبانێ پەی ئا مڎرامان و سەرکۆتە تاریخیە گێڵۆوە. بەڵام سەرەڕاو ئاستو هرووژمەکا، گەلوو کوردی و جمېیەرو ئازادیی کوردەسانی جە راسی کۆبانێ و رابەر ئاپۆینە سەرکۆتۍ بە یەکجاری مویناش. ئێمە ئینایمۍ دووەم قۆناغەو هەڵمەتەو مېیاننەتەوەیی 'ئازادی پەی رابەر ئاپۆی و چارەسەریی دیموکراتیکی پەی پرسو کوردی'نە. ئارۆنە ئەندێشەکۍ رابەر ئاپۆی سەرچەمەو ئازادیی پەی گرڎو چێردەسا و چەوەسیاکا و تا مۍ زیاتەر وەڵا مەبۆوە. هەرپۆکەی ئەرکو ئێمەن ئا هەڵمەتۍ فراوانتەرە بکەرمۍ کە پەی ئازادیی جەسەیی رابەر ئاپۆی دەسشپنەکریان. گرڎو رێکوزیا و ئەرەمەرزیا ئازادیوازەکا، گەل و هونەرمەڼا مشۆم ئا حەقەتینیە بوینا. مشتومڕ و پێشئامایەکۍ ئی دماییە نیشانەو ئێمەشا دان کە تەنیا ئا وەختە دیوارو فاشیزمی وڕۆ کە پەرە بە رێکوستەی و چالاکی یەکانگیری چنی رۆحو سەردەمی بڎەیمۍ و جە ئاکامو ئینەیچەنە ئازادیی جەسەیی رابەر ئاپۆی مسۆگەر مکەرمۍ.

فاشیزم جە گرڎ بوارەکانە کۆیلایەتی سەرو گەلوو کوردیرە مسەپنۆ. ۋەرو ئینەینە گۆشەگیری جە کەسایەتی رابەرایەتینە قووڵتەر مکریۆوە. مەڵامەتوو هرووژمەکایچ پەی سەرو کولتورو کوردیچ هەر ئینەنە. فاشیزم تەنانەت ۋەرا ۋەر بە گولانەتەرین بەشو بەهاکا کوردی نمەتاوۆ دڎان گێرۆ ۋێشەرە. کەواتە هونەرمەڼا و سەرمەشقا گلێرگەکەیما مشۆم پەشتیوانی جە هەڵمەتەکۍ بکەرا کە جە لایەنو دۆساو گەلەکەیماوە دەسشپنەکریان. چا چوارچێوەنە جەمۍ چالاکیۍ جە هەر چوار بەشو کوردەسانی و سەرانسەرو ئەوروپاینە ملاڕاوە. تەنیا بەشداری کەردەی چا چالاکیانە وەسۍ نییا. پەنەوازی وڵاتپارێزنی چی قۆناغێنە ئانەنە کە جە بەرزتەرین ئاستەنە شانە بڎریۆ ۋەرو بارو ۋەرپرسیاری. رێکوستەی و چالاکی، دیوارەکاو فاشیزمی وڕنۆنە و گۆشەگیری ماڕۆ. ئێمە پېسە جمېیەرو کولتور و هونەری جە ئەوروپانە داوا جە گرڎو وڵاتپارێزنا و هونەرمەڼاو کوردی مکەرمۍ کە بە رۆحو سەفەربەریۆ چی قۆناغێنە بەشدارۍ با. هونەرو ئی قۆناغۍ مشۆم جاڎە بە جاڎە بە دروشمەو 'هونەری ئازاڎ پەی ئازادی' وەش بکریۆ. هەرپۊکەی داوا جە گرڎ کەسۍ مکەرمۍ کە جە یووەم تا ١٦و تشرینو دووەمی بە رۆحی سەفەربەریۆ هەرمانە بکەرا و جە ڕاپیمای گۆرەو کۆڵنینە جە ١٦و تشرینو دووەمینە بەشدارۍ با".