ئەچی حەفتە دماینەنە چڼین ڕووەدایۍ دلۍ شەنگالینە ڕووەشا دا و گەشەسانای سیاسی و گلېرگەیی ئاما ئاراوە، کە بڕېشا پېسە ڕۆژەڤی گەرمی بەردەوامېنۍ. پاسە چەمەڕا کریۍ سەرەتاو مانگەو حوزەیرانی قایمقامیەتوو شەنگالی و ئیدارەی تازە بنریۆرە، بەڵام دماو دەسوەردایەکا دەوڵەتوو تورکی و پەدەکەی، کاروباروو قۆناغەکەی مردا. جە لېوەتەرۆ پەی وەشکەردەی پشېوی و ناکۆکی جە بەینوو گەلو عەرەبی و گلېرگەو ئێزیدینە ئینا کۊششەنە. حەرپاسە حکومەتی عێراقی جیای ئانەی ڕا چی کۊششا بگېرۆ ، بە پێچەوانۆ بە شێوېوە جە شېوەکا بیەن بە ڕا وەشکەر، فشاری زیاتەر سەروو ڕاوەبەری خۆسەری مکەرۊ.

هامسەرۆکوو دەسەی ڕاوەبەری شەنگالی خودێدە ئیلیاس جە ڕاو ئاژانسیماوە باسش جە هەڵوێسوو گلېرگەی ئێزیدی کەرد سەبارەت پی مژارا و حەرپاسە هۊرسەنگنایش کەرد پەی پرۆسەو گېڵایۆ ئاوارەکا و سەرجەنۆ ئاوەڎانکەردەیۆ شەنگالی.

'پەدەکە جە ڕوو سیاسیوە جارێوەتەر مەتاوۆ ۋېش بسەپنۆ سەروو ئیرادەو شەنگالیرە'

خودێدە ئیلیاس جە سەرەتاو قسەکاشەنە باسش چانەیە کەرد کە پلانەی سیاسیە سەرو شەنگالی بەردەوامەنە و واتش: "جە پەیمانەو ٩و تشرینی یووەمینە گەرەکشابۍ ئیدارەدای شەنگالی جارێوەتەر گېڵناوە پەی دەسەڵاتداری پەدەکەی و ئا کەسۍ کە شەنگالەنە بڕەمۍ بېنۍ، بەڵام گەلو شەنگالی ئینەش قبوڵ نەکەرد. پەدەکە جە ٢٠٠٣ېوە هەتا ٢٠١٤ شەنگالەنە بۍ، بەڵام حیچ چېوێش شەنگالەنە بنیاڎ نەنیا و گلېرگەو شەنگالیش پەی قڕکەردەی ٢٠١٤ ی جیا ئاست. کەواتە چنی جارێوەتەر چەمەڕای ئانەی مکەرۆ کە ئیدارەو شەنگالی بکەرۆ؟ جە ڕوو سیاسیوە هیچ وەختۍ مەتاوۆ ۋېش سەپنۊنە سەروو شەنگالیرە، ئیدارەو شەنگالی پێویسا جە تەرەفوو ئیرادەو شەنگالیوە بۆ."

'گەرەکشانە ئاژاوۍ دلۍ گلېرگەو ئێزیدی و گەلو عەرەبینە بنیاوە'

خودێدە ئاماژەش پانەی دا کە کۊششۍ هەن پەی ئانەی جە شەنگالەنە بەبێ ڕاوەبەری خۆسەری شەنگالی، سیستمێوە ئەرەمەرزیۆ و پی جۊرە بەردەوام بۍ: "گەرەکشا نیا ئیدارەو شەنگالی وەشبۆ، کۊششۍ هەن پەی وەشکەردەی پشېوی جە بەینوو گلېرگەو ئێزیدی و گەلو عەرەبینە. جە دماو ٢٠٠٣ېوە پەدەکە کە ئیدارەو شەنگالی ڕاوەبەر کەرۍ چ چېوېش بنیاڎ نیا، گلېرگەو ئێزیدی و گەلو عەرەبیش کەردۍ گژۍ یۊترینیرە. جە ئیساتېچەنە هەمدیسان کۊششۍ هەن پەی ڕاوەبەردەی سیاسەتێوە پی جۊریە. هیواڎارېنمۍ حکومەتوو عێراقی، پێکئاماو شەنگالی ۋەرچەم بگېرۆ. گەر بە پاو پەدەکەی بۆ، پېسە چنی شەنگالش چۆڵکەرد جە ۋییەردەنە، ئانە پەی ١٠ ساڵا تەریچ شەنگال پاسە مەنۆوە."

'جارێوەتەر تەسلیمۍ پەدەکەی مەبیمېوە'

جە بەردەوامی قسەکاشەنە خودێدە واتش: "نیەنمۍ چنی پارچەکەردەی خاکوو عێراقی، گەرەکمانە عێراقێوە فیدراڵ و دیموکراتیک ئەرەمەرزیۆ. پېسە گلېرگەو ئێزیدی ۋېما پېسە گەلو عێراقی مۋینمۍ. ئێمە خاکوو ۋېما پارېزنمۍ. جە قڕکەردەی ٢٠١٤ینە بە ئەرەکۊشای جەنگەوانا ئێزیدی، ئاڵاو عێراقی سەروو کەش و شەنگالیوە مەنۆ. پێویسا حکومەتوو عێراقی ئی حەقەتینەیە جە یاڎ نەکەرۆ. ئێمە جارێوەتەر تەسلیمۍ پەدەکەی مەبیوە."

جە دمادماینە هامسەرۆکوو دەسەی ڕاوەبەری شەنگالی خودێدە ئیلیاس داواش جە حکومەتوو عێراقی کەرد قەرارەکاو ۋېش جابەجۍ بکەرۆ و ٣٠ حوزەیرانی بەرەو کامپەکاو پانیشتوو کوردسانی بوزۆرە و هەرمانووکارەکا گېڵایۆ ئاوارەکا جابەجۍ بکەرۆ.