کۆمیتەو پەیوەندییەکا کەجەکەی پەیامێوە سەرەوەشیش پەی کۆچی حەقەتینو عومەرو حاجی حسێنی کۆششکاری قەڎیمی وەڵاکەردۆ و ئەرەیاۋناش، کۆچو هەڤاڵ عومەری خەسارەتێوە گۆرەن پەی گەلەکەیما، هەمیشە جە یاڎ و زیهنو گەلوو کوردەسانی و شۆڕشگێڵنا و وڵاتپارێزنانە مەنۆوە.
هەڤال عومەرو حاجی حسێنی پێشمەرگەی قەڎیمی و وڵاتپارێز، کە ٤٥ ساڵۍ تەمەنیش دلۍ ئەرەکۆشای نەتەوەیی گەلوو کوردینە بیەن و تا دما هەناسەش جە کۆششی نەتەوەیی و ڕەنج و وڵاتپارێزنیی نەبڕیارە و جیانەمەن، شەوەو ٢ۍ تشرینو دووەمو ٢٠٢٤ بە مەڵامەتوو ۋنوەربیەی جگەریشۆ دماو چن ڕوۍ مەنەیۆیش جە خەسەخانەنە عەمرەو خوڎایش کەرڎە.
کۆمیتەو پەیوەندییەکا جبەرو کۆما جڤاکێن کوردەسان-کەجەکە، پا مەڵامەتۆ پەیامێوە سەرەوەشیش وەڵاکەردۆ.
دەقو پەیامەکەو کەجەکەی پی جۆرەنە:
پەی ڕای گرڎینی
بە داخ و ئەسەفێوە فرۆ هەواڵو کۆچی حەقەتینو کەسایەتی کۆششکاری و قارەمانی، پێشمەرگەی قەڎیمی و نیشتمانپەروەری “عومەرو حاجی حسێن”یما لا یاوا، پی بۆنە خەمناکۆ پەرسە و سەرەوەشی ۋێما ئاراسەو گرڎو گەلوو پانیشتوو کوردەسانی، گەلەکەیما جە کەرکووک و چەمچەماڵ و بەتایبەتیچ بنەیانەو ئێژا هەڤاڵ عومەری مکەرمۍ.
هەڤاڵ عومەرو حاجی حسێنی جە قولەپۆپەنە نوێنەرایەتی هەستی شۆڕشگێڵنیی و نیشتمانپەروەریی کەرۍ
و بە درێژایی ٤٥ ساڵا هەمیشە پەی ئازادیی و یۆبیەی گەلوو کوردی، سەرەمڕە کۆشش و ئەرەکۆشایش کەرڎ و بە درێژایی تەمەنو ۋێش جە دژو ئەرەگیرا سەرو کوردەسانی خاوەن هەڵوێس بۍ، ئاڎ پېسە خۆنکارێوە بە ئەمەکو گەشمەرڎەی سەرمەشقی و سەرکردەو گەلەکەیما هەڤاڵ ئارامی، پېسە پێشمەرگێوە قارەمانی، بە هەست و بە ئیراڎە و بە جەسەو ۋێش وەرگەو زینانیی کەردەی و ئەشکەنجە و گوللەوارانو ڕژێمو سەدامیش گێرت و جە ۋەرا ۋەرو زوڵم و ئەرەگیری سەدامو سەردەمینە واتە ئەردۆغانی فاشیستی و چەتە بەکرێگرتەکاشەنە بە هەمان هەست و ئیراڎۆ درێژەش بە ئەرەکۆشای و ۋێڕاگری دا، ژیۋای هەڤاڵ عومەرو حاجێ حسێنی داسانی ئازایەتیی و گیانبازیی و قارەمانیی و سەرچەمەو ورەین، هەستی نیشتیمانپەروەریی و نەتەوەیی هەڤاڵ عومەری تەنیا بە پانیشتوو کوردەسانیوە سنووردار نەبۍ، بەڵکم سنوورە دەستکردەکێش ۋییەرنۍ بێنۍ و جە ناخو زېڵێشۆ بڕواش بە یۆبیەی نەتەوەیی بۍ، هەر پۊکەی جە دژو جەنگی سەپیاو دلێینەی جە پانیشتوو کوردەسانینە هەڵوێسش هۆرگێرت، ئا زیهنییەت و سیاسەتەشە ڕەڎکەردۆ کە ڕاش پەی وەش مکەرۆ و جە زێلە گۆرەکۍ ۋێشەنە ڕا پەی گرڎ گەلۍ و گرڎو کوردەسانی و گرڎو مرۆڤایەتی کەردۆ، سەرو ئی بنەمایۍ بە ئەنەیاوایۍ قووڵ جە فەلسەفە و ژیۋای ڕابەر ئاپۆی، بە پارادایم و ویرۍ تازۆ، پەی ئاردەینە زیهنییەت و سیاسەت و کلتوورێوە تازەی جە پانیشتوو کوردەسانی و ئازادیی و یۆبیەی نەتەوەیی جە هەر چواربەشو کوردەسانینە درێژەش بە ئەرەکۆشایۍ هەمەلایەنەی دا و جە هیچ فیداکاریێ و جە ۋۍ ۋییەردەیۍ درێخیش نەکەرد.
کۆچو هەڤاڵ عومەری خەسارەتێوە گۆرەن پەی گەلەکەیما و ئاڎ پێسە گەشمەرڎێوە سەربەرز و خاوەن میراتێوە گۆرەی شۆڕشگێڵنیی هەمیشە جە یاڎ و ویرەوەری گەلوو کوردەسانی و شۆڕشگێڵنا و وڵاتپارێزانە مەنۆوە و مەبۆ بە ڕانیشاندەرو کۆششی و ئەرەکۆشای، جارێوەتەر پەرسە و سەرەوەشی ۋێما پێشکەش مکەرمۍ، هیواڎارێنمۍ گیانو هەڤاڵ عومەری بە بەهەشتی بەرین شاڎ بۆنە و سەبووری و دڵنەوایی بە گەلی و هەمڕایا و بنەیانەیش بڎۆ".
